Agerrud bu-snat tyemmatin

(D'après: The Baby with two Mothers, by Anne de Graaf)

Traduction: Djaafar Messaoudi

Nnig n tneflit i as-d-ittunefken s γur Axellaq, Sidna Sliman ittwabudd-d

daγen s twassna tameqqrant. S twassna-ya, issawaḍ ad ifru kra n tlufa umi
wer izmir umdan ad yaf tifrat.

Yiwen wass, usant-d γer teγremt n Sidna Sliman snat tlawin, yiwet d
timizwiγt tayeḍ d timibrikt. Yal yiwet deg-sent teddem-d agerrud deg ufus is.
Igerruden-nni ttemcabin aṭas, maca yiwen deg-sen d amuddir wayeḍ d
amettin. Sersent snat tlawin-nni igerruden-nsent sdat n uεric n ugellid,
qqumcent, bdunt la d-ḥekkunt ayen tent-id-yewwin γer dinna. Agellid
yesmuzgut-asent s uhannay ameqqran.

“Ay-Unnig-nsen ”, d-tebda tmeṭṭut timizwiγt, “Nekk ttidireγ di yiwen uxxam

akd tmeṭṭut-a ; nettat d takna-inu. Azal n wagur aya, s kra n wussan kan
gar-anteγ, i snat yid-nteγ nurew-d sin yigerruden illan s tezmert igerrzen.
Armi d iḍelli tameddit, agerrud n tmeṭṭut-a ibda ittiẓẓif. Netta ad yili immut
kra n tsaεtin deffir mi nessexsi tafat akken ad neṭṭes. Ur ifaq yiwen s wayen
iḍran i ugerrud-a siwa yemma-s. Dγa imi nekk tuγ-iyi γebbseγ deg yiḍes
alqayan, tfuṛes tagnitt tekker-d di talest, teddem-d agerrud-iw terr waynes
deg umkan-is. Mi d-ukiγ tasebḥit-a, faqeγ agerrud illan γer yidis-iw ur
isnuffus ara. Mi ḥekkreγ nezzeh deg-s, ukzeγ netta mači d-waynu”. Imir-n
kan, tenṭeq-d tmeṭṭut timibrikt tini i Sidna Sliman s yimeṭṭawen deg wallen:
“Uhu, ay-Unnig-nsen ! Tameṭṭut-a la teskiddib. Agerrud amuddir d ayla-w”.

Din-din, tegzem-as awal tmeṭṭut timizwiγt twekked-as i Sidna Sliman belli d

amuddir i d agerrud-is. Sakin la itteddu ad ikker umerẓi imawi ger snat
tlawin-nni. Imir-n dγa, inṭeq-d ugellid γur-sent: “Dayen ! Dayen ! Imi akk-a
yal ta la teqqar d nekk i d yemma-s n ugerrud amuddir, tura ihi ad
nesseεdel gar-akent d wad tellzemt i snat yid-kent”. Akk wid illan dinna
baten u bdan la ttemseqsayen acu ara yeg ugellid amassan. Irfed Sidna
Sliman afus-is yini i yiwen seg yiεessasen-is: “Ay-aεessas, ddem-d agerrud-
ihin amuddir, bḍu-t γef sin s tkuba-inek tefkeḍ seg-s i yal yiwet amur-is”.

Din-din tebda tmeṭṭut timibrikt la tettiγwis u la tessutur deg ugellid akken

ad isemmet andah-is: “Annaγ ay-Unnig-nsen ! Ttxil-k ur t-neqq ara ! Wicqa,
efk-as-t i nettat, awi-d kan ad idder”. Wamma tameṭṭut-nni nniḍen, s yiwet
tγara tameckukt i tessentag Sidna Sliman akken ad ireṣṣi andah-is: “D awal
uṣwib ay-Unnig-nsen ! bḍu-t γef sin akken yal yiwet seg-nteγ ad tuγal s
tumert γer uxxam-is s tunt-is”.

Mti irfed uεessas takuba-ines akken ad igzem agerrud-nni, isγel-as Sidna

Sliman akken ad iḥbes. “Efk agerrud-nni i tmeṭṭut-a timibrikt”, d-as-yenna.
“Nettat i d yemma-s, acku siwa tayemmatt taḥeqqanit ara issirmen i mmi-s
tudert di tegnitt am ta”.

Akk-a ihi, s tumert tameqqrant, tuγal-d tmeṭṭut timibrikt s ugerrud-is γer

uxxam. Ma d takeddabt-nni timizwiγt, nettat tettwazen γer usaqqal, sakin
asmi d-teffeγ yebra-y-as urgaz-is.