Jinghpaw Wunpawng AmyuShaHpung Kachin National Organization

Email: kno.ghq@gmail.com, Website: www.kachinland.org

Jinghpaw Wunpawng Amyu Sha Hpung (KNO) Hpaw Ninghtan dat ai (15) Ning Hpring Shatsam Mungga
(9th January, 2014) Hkungga tsaw ra ai, Jinghpaw Wunpawng Amyu Sha Hpung (KNO) Ginjaw Komiti ni, Malawm ni, Hpung shang masha ni yawng, Kanu Mungdan hte maigan mungdan shara shagu kaw nga nga ai, Jinghpaw Wunpawng Mungchying Mung shawa ni yawng hpang de ndai shatsam mungga hte shakram dat nngai law. Dai ni na nhtoi gaw, Anhte a Mungdan hpe, Shadip jahpang hte hpring tsup ai Awmdawm Shanglawt lu na mung masa bandung hta ngang ngang tsap let, Jinghpaw Wunpawng Amyu Sha Hpung (KNO) ngu ai mung masa wuhpung kaba hpe hpaw ninghtan dat ai (15) ning hpring ai nhtoi rai nga ai. Jinghpaw Wunpawng Amyu Sha Hpung (KNO) hpe hpaw ninghtan dat ai shani kaw nna, tinang Jinghpaw Wunpawng Amyu Sha ni tat sum mat sai shadip jahpang ahkang aya hte Shanglawt lam ni hpe kalang bai lu la na matu hpaw ninghtan dat ai wuhpung re ai hte maren ndai (15) ning laman e, lamang law law hpe awng dang ai hte galaw la lu saga ai. 1) KNO gaw, Jinghpaw Wunpawng Mungdan hte Amyu Sha ni Awmdawm Shanglawt lu la na mung masa bandung hta ngang ngang tsap ai. 2) KNO gaw, Wunpawng Mungdan Shanglawt Hpung (KIO) galaw ai magam bungli shagu hta ding yang madi shadaw let, mung masa shamu shamawt lam ni hpe galaw ai. 3) KNO gaw Maigan Mungdan shara shagu kaw, chyam bra hkawm nga ai Jinghpaw Wunpawng Amyu Sha ni yawng hpe makawp maga ai lam galaw ai. Shanglawt Mung masa lam shagu hta woi awn ai. Tinang Amyu sha ni du nga sai mungdan shagu hta, nga lu na ahkaw ahkang lu hkra galaw ya lu sai. 4) Maigan Mungdan Asuya ni hpe Jinghpaw Wunpawng Amyu Sha ni a lam hte seng nna hkrumzup bawngban ai lam ni hpe mung lang hte lang galaw la lu ai. Jinghpaw Wunpawng Mungdan hte Amyu sha ni hta byin nga ai mung masa sat lawat ni hpe tang madun dan ai lam galaw ai. Tinang Jinghpaw Wunpawng Amyu Sha ni hpe, garum shingtau ya na matu, hpyi lajin ai lam ni hpe galaw ai. 5) Wunpawng Mungdan Shanglawt Hpung (KIO) hte United Nationalities Federal Council (UNFC) hta mung rau shang lawm n gun dat galaw nga ai. 6) KNO gaw, 2011 Ning June shata praw (9) ya shani, (KIO/KIA) kaw nna woi awn let Tai hpyen Myen Asuya hpe ninghkap gasat ai Padang Hkrunlam Majan Masing hpe mung ja ja madi shadaw let, majan masing shagu hta, mung shawa hte rau shanglawm gasat ai lam hpe galaw ai. 7) Mungdan shara shagu kaw nga ai (KNO) wuhpung ni hku nna mung, Tsinyam hkrum sha nga ai Jinghpaw Wunpawng Amyu Sha ni hpe, tinang dangdi dangdep ai daram, masha hkum nan
1
UK Office: Thailand Office: Tel: 44 753 825 8961, Email: kno.thailand@gmail.com Fax: 44-208 568 2246, Email: UK @kachinland.org Malaysia: knomalaysia@gmail.com India Office: USA Office: Denmark Office: Email:kno_India@yahoo.com 5842 Stevens Forest Rd. #23 Tel: (45) 7543 7227 Columbia, MD 21034 Email:knodk@yahoo.co.uk USA Email: gumsan@kachinland.org Japan Office: Email: kno5japan@yahoo.com

(snr) Ja gumhpraw, Arung arai ni hpe garum madi shadaw ai lam ni hpe mung ding yang galaw nga ai. 8) (KNO) wuhpung kaw nna hpaw shabawn da ai United Kachinland Army (UKA) hpyen dap hpe mung, hpyendap langai sha rai ga ngu ai gabaw kata kaw, Wunpawng Mungdan Shanglawt Hpyendap (KIA) hpe n gun ja hkra pawng hpawn nna, shawnglam majan pa ni hta Tai hpyen wa hpe lata tut jawm gasat nga sai. (KNO) wuhpung hpe hpaw ninghtan dat ai lam a yaw shada ai lam hte maren, shawng ningnan, Jinghpaw Wunpawng Amyu sha ni a kam maka hpe Jinghpaw Wunpawng Amyu sha ni nan dawdan hparan lu na matu gaw, anhte Jinghpaw Wunpawng Amyu Sha ni yawng shanglawt lu ai amyu, lawt lu ai amyu lakung ni tai ra ai. Dai majaw, Shanglawt wenyi hpe ja ja jum tek manat let, Amyu sha ni a shawng lam lahkam shagu hta, lahkrip ra ra, myit hkrum mang rum hte hkawm sa ra nga ai. Ya dai ni na Jinghpaw Wunpawng Amyu Sha Ningbaw Ningla ni a mung masa shamu shamawt ai lam ni hpe yu nna hpa myit ung ang na lam nnga ai. Myen hpyen asuya hte ya na zawn mung masa bawngban jahkrup ai lam gaw, rapra ai ahkaw ahkang kata kaw, lu ging lu ang ai ahkaw ahkang ni hpe lu hkra shakut shaja nga ai lam re. Jet ai Munghpawm Mungdan byin tai wa lu na matu shakut shaja ai lamang ni sha rai nga ai. Dai hta grit nem ai gabaw kata hta Tai hpyen Myen Asuya hte bawngban jahkrup na lam nnga ai. Ga Hpungdim hku nna n gun jaw num htet ga tsun mayu ai lam gaw, tinang (KNO) wuhpung kaw nna gaw, Jinghpaw Wunpawng Mungdan kata shanu nga ai Mung chying, Mung shawa ni yawng shawnglawt lu na hte Jinghpaw Wunpawng Mungdan shanglawt lu na lamang hpe ding yang galaw shakut shaja sa mat wa na re. Anhte Jinghpaw Wunpawng Amyu Sha ni, rawt malan lamang shagu hta myit kaji na lam nnga ai. Myen ni kaw nna rapra ai ahkaw ahkang kata kaw rau nga na hpe nkam ai lam byin wa tim, myit machyi na lam nnga ai. Mungkan mungdan shara shagu kaw nga ai Jinghpaw Wunpawng Amyu sha ni yawng gaw,Awmdawm Shanglawt ngu ai bandung hta sha ngang ngang tsap let, Mungdan hte, Amyu sha lawt lu lam hpe sha n gun dat shakut shaja sa mat wa na sha ahkyak dik rai nga ai. Dai majaw tsawra hkungga ai Jinghpaw Wunpawng Amyu Sha Hpung (KNO) Ginjaw Komiti ni, Malawm ni hte Jinghpaw Wunpawng Amyu sha ni yawng hpe htet mayu ai gaw, tinang amyu sha ni lawt lu na matu gaw, tinang hkum ngau shagu hta lit nga ai hpe galoi mung myit dum let, tinang Mungdan, tinang Amyu sha ni a matu, tinang nan shang lawm ra ai, ngu ai myit masin hte, Jinghpaw Wunpawng Mungdan Awmdawm Shanglawt lu ai shani du hkra, yawng lata gindun, myit mang hkrum let, Myit ung ang ai lam nnga ai sha, Anhte Amyu sha ni a lawt lu lam hta,lahkrip ra ra, jawm shakut sa wa ga ngu lajin dat nngai law. Jinghpaw Wunpawng Mungdan Teng sha Awm dawm Shanglawt lu na. Jinghpaw Wunpawng Amyu Sha ni Teng sha Agrin nga na.

Bawmwang La Raw Ningbaw(KNC/KNO) Jinghpaw Wunpawng Amyu Sha Hpung (KNO)

2
UK Office: Thailand Office: Tel: 44 753 825 8961, Email: kno.thailand@gmail.com Fax: 44-208 568 2246, Email: UK @kachinland.org Malaysia: knomalaysia@gmail.com India Office: USA Office: Denmark Office: Email:kno_India@yahoo.com 5842 Stevens Forest Rd. #23 Tel: (45) 7543 7227 Columbia, MD 21034 Email:knodk@yahoo.co.uk USA Email: gumsan@kachinland.org Japan Office: Email: kno5japan@yahoo.com