Malawm ni Laika man 1. Ningbaw Wa A Shakram Mungga ...................... 2. KBC Amu Madu A Numhtet Ga .......................... 3.

KBC Masat Laban Nhtoi Labau Kadun .............. 4. Nawku Lamang ................................................. 5. KBC Masat Laban Mungga ............................... 6. Akyu Hpyi Na Lam Ni ........................................... 7. KBC Ginjaw Magam Gun Ni .............................. 8. Daini Na Mabyin Masa Lam Ni . ........................ 9. Oversea Kachin Baptist Community ................. 1 2 4 7 8 13 15 16 18

10. KBC Ginjaw Sasana Magam Bungli Report Ni.... 19 11. 2013 Hta Lu La Ai KBC Masat Laban Alu ............. 22 KBC NINGBAW WA A SHAKRAM MUNGGA 2014 ning March shata (16) ya shani ang ai KBC Masat Laban hta, KBC hta shanglawm nga ai Ginwang hte Buga ni, Hpung magam gun ni hte Hpung masha ni yawng hpe kabu gara shakram dat ai law. Anhte a Wa Karai Kasang hte Madu Yesu Hkristu kaw na chyeju hte ngwi pyaw ai gaw nanhte hta e anga nga malit ga law. Dai ning 2014 ning gaw KBC a Mu gun ladaw, 2010-2014 a hpang jahtum shaning rai nga ai majaw 2014 ning March shata (27-30) laman galaw na (37) Lang na KBC Hpung Shawa Zuphpawng hta yawng ahkum ara du sa wa na akroi anoi saw lajin dat ai. Anhte hpe tsawra ai, Hpung shingkang rawng ai Karai Kasang gaw anhte hpe, gasat gala majan tsinyam kaw na mung lai di tawt kawt na n-gun atsam jaw ai hte Shi a grau htum ai lahpum hte woi wa nu ai. Anhte chyeju dum shakawn nga ga! 2013 ning hta mung, Myenmung Hkalup Hpung Sasana (200) ning hpring chyeju shakawn hpawng kaba hpe Yangon kaw KBC hte MBC hku nna woi awn galaw ai hta Hpung masha law law du sa nna, masha amyu bawsang law law hpe Karai Kasang a Hpung shingkang shapraw shadan dan lu saga ai. Chyeju dum shakawn nga ga law! Ya dai ning 2014 ning du ai shaloi, anhte KBC hku nna Hpung Shawa Zuphpawng kaba hpe galoi mung garai n-galaw yu ai ja lungseng pru ai Uru Sengmaw ga kaw galaw lu na Karai Kasang ahkaw ahkang jaw ya ai majaw chyeju shakawn shara rai nga ai law. Ndai Hpung Zuphpawng kaba hta, mungkan shara shagu de du

nga ai ni, buga, ginwang shara shagu de na du zup shajang ai hte, anhte a shawng lam a matu myithkrum mangrum, myit shabawn nna chyeju shakawn, apnawng, n-gun da ting la ga law. Kangka sadi dung ai hte Hkristu hta kaba rawt wa ga! Madu a grau htum ai Magam hta,
Rev. Hkangda Tu Lum KBC Ningbaw

KBC AMU MADU A SHAKRAM GA KBC Nawku Hpung masha ni yawng a matu labau hta grin nga lu na matu Karai Kasang a hpung shingkang danhkung nga lu na matu KBC Masat Nhtoi galaw ai gaw grai ahkyak ai lamang langai rai nga ai law, KBC Masat Nhtoi galaw ai nawku hpung sha KBC ajet rai nga ai. Daini mungdan kata, mungdan shinggan de KBC Nawku hpung ngu nna gaw shamying tim, KBC Masat Nhtoi n-galaw ai nawku hpung ni gaw, KBC Nawku hpung n re hpe asan sha chye na ga. Daining 2014 gaw (59) lang na KBC Masat Nhtoi rai nga mali ai. Laning hte laning ga baw langai ngai hpe la nna, dai ga baw hta maju jung tatut hkrang shapraw sa wa ga ai. Dai ning gaw Kangka Sadi Dung Ai Hte Hkristu Hta Kaba Rawt Wa Ga ngu ai hta hkrang shapraw sa wa na matu re. Dai ning na ga baw gaw daining na mabyin hta gara hku hkrang shapraw na hpe wa madi madun nga ga ai hku re. Daining gaw Myen mungdan kata, yuptung jahpan hta nna, anhte KACHIN ngu ai hta myit hkrum nga ai hpe bra ayai hkra galaw na hkyen nga sai. Dai majaw anhte gaw anhte amyu wunpawng sha ni hta sadi dung kangka ra ga ai. Bai maigan de du nga ai KBC hpung masha ni mung gara mungdan kaw mi du du, tinang a amyu hte tinang a hkalup makam hkringhtawng hta n shut n shai ngang ngang tsap let, KBC de matut mahkai sa wa ai hta sadi dung kangka nga ga. Sara kaba Hanson tsun ai ga hpe galoi mung myit dum nga ga. Nanhte myitmang lawan jahkrum mu, nanhte myithkrum ai shani hkawhkam (mungdan) teng sha lu na re. Hkristu hta kamsham manoi manat let KBC hte myusha lam hta sadi dung kangka sa wa ga law.

Sadi dung kangka let, Hkalam Samson KBC Amu Madu Laksan shana ai lam 1. Asuya lahkawng lapran gaphkat ai lam yawm mat ai zawn byin nga tim, Hpyen yen ni hpe matut karum ra ai lam ni grai naw ra nga ai hpe dum ga. 2. Yuptung jahpan hta ai shaloi Kachin ngu ai hta n bang yang htawm hpang anhte Kachin ngu ai mai mat mat ai hpe dum ga.

3. Akyu hpyi ai lam hta grai naw n-gun shaja ga, lusha gam akyu hpyi ai lam ni mung shalawm ga. 4. Nanghpam lusha pat jasan awng dang wa lu hkra akyu hpyi ga. KBC MASAT LABAN NHTOI BYIN WA AI LABAU KADUN 1877 ning hta American Hkalup Sasana ni Yesu Hkristu a kabu gara shiga hpe Jinghpaw Wunpawng myu sha ni hpang de htawn tsun shachyen hpang sai. 1882 ning March shata (19) ya shani marai (7) gaw Yesu Hkristu hpe hkyela Madu majing hku kamsham let myit malai sai majaw Sasana Sara kaba William Henery Roberts gaw shanhte hpe Manmaw Gauri krung, Bumwa kahtawng na Nam mawk hka shi hta hkalup hkam ya sai. Dai kaji kawoi ni gaw: 1. Maran Bawmung La 2. Maran Bawmung La jan Nangzing Hkawn 3. Maran Adan Yawng 4. Maran Adan Yawng jan Lahpai Ja Tawng 5. Nangzing Yung Wa 6. Nangzing Yung Wa jan Lazum Kaw Lum 7. Gawlu Htang Yawng ni rai ma ai. Ndai zawn yawng a shawng nnan hkalup hkam la ai shani hta, Sara kaba Roberts hte Mama, Sara Cronkhite hte Mama, Kayin sasana Sara ni - Sara SPeh hte Sara jan, Sara Mawke hte Sara jan, Sara Ko Hte hte Sara jan Maran Kaw Lum hte Sara Shwe Gyaw ni lawm ma ai. Dai shani jang Madu Yesu a hkum hkrang ngu ai Ga Shaka Ningnan Lusha Ku hpe, Sara SPeh gaw Chyoi pra ai Chyum Laika hpe Kayin hku hti nna, Jinghpaw ga hku lachyum tsun dan; Sara kaba Roberts gaw muk hpe akyu hpyi shaman ya; Sara Cronkhite gaw sabyi hpe akyu hpyi shaman ya ma ai. Dai shani Ga Shaka Ningnan Lusha hkam la ai La marai (10), Num marai (8) yawng marai (18) re. Jinghpaw Wunpawng amyu sha ni hkalup shawng hkam la nna, Madu Yesu a Ga Shaka Ningnan Lusha hpe shawng ningnan sha hpang ai shani rai nga ai. Dai shani hpe adum nga let manu shadan nga na matu, KBC ningbaw ningla ni gaw, 1955 ning kaw nna, KBC Masat Nhtoi galaw na hte hkalup shawng hkam la ai March shata (19) ya shani hte grau ni dik ai laban shani hpe, KBC Masat Nhtoi shatai masat wa sai re. Dai shani hta KBC Sasana Magam bungli a matu alu jawm bang wa saga ai. Lu la ai alu hpe sasana majen je ai magam hta lang na matu, KBC Ginjaw hta budget kaw bang shalawm wa saga ai. Jinghpaw Wunpawng sha ni hpe Karai Kasang tsawra ai majaw kaji kawoi marai 7 hkalup shawng hkam la ai kaw nna, Sasana maden jat wa ai gaw daini ndai aten kaw du hkra rai nga ai. Ndai marai 7 gaw anhte a makam hkinghtawng, ninghkring ni rai nga ai. Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a dan hkung ai magam hpe shabrawng dat ya myit ga, lata la ai amyu, hkawhkam hkinjawng ni, Chyoi pra ai amyu baw hte, Karai Kasang lahku la ang ai masha ni, rai nga myit dai. Nanhte mung, shawng e amyu rai nga myit dai n rai, ya chyawm gaw, Karai Kasang a amyu rai wa manit dai; shawng e chyeju hkam la manit dai nrai, ya chyawm gaw, chyeju hkamla lu manit dai. (1 Petru 2:9-10)

Lai wa sai 1982 ning March shata (19) ya shani hta, hkalup hkam ai (100) ning hpring chyeju shakawn ap nawng poi hpe galaw lu sai. Hkalup hkam la ai shara kaw, Manmaw Ginwang, Mungga Hkran Hkalup Hpung ni gaw, Sasana lamu ga hku masat la nhtawm, shaning shagu KBC Masat Laban Nhtoi nawku hpawng lamang hpe galaw ai sha n ga, prat tup labau shang matsing masat da lu na matu, masat shadaw hpe, wut, nlung, bilat, namhtun hte ngang ngang kang kang gaw da masai. Hkalup shawng hkam la ai jiwoi jiwa marai (7) a mying hpe mung masat shadaw hta tawk ka da masai re. Lai wa sai 2007 ning March shata 16-19 laman, KBC Hkalup Hkam (125) Hpring Chyeju Shakawn Hpawng hpe (52) lang na KBC Masat Laban Nawku Hpawng hte hpawn, wu wu di di galaw lu saga ai. Matut nna mung, ndai ginra hpe tsawm htap grin jat wa lu na matu, KBC Labau Mazing Komiti hte Manmaw Ginwang ni lata gindun let masing masa gran nhtawm jawm shakut nga ga ai. Jiwoi ni marai (7) hte gaw de hpang wa ai Jinghpaw Wunpawng Hkalup Hpung (KBC) gaw, dai ni ndai aten hta, hpung masha marai (370,000); Ginwang (15); Buga Hpung (363) rai nhtawm, Hpung woi ni yawng (2000) rai nga sai re. Ji jaw nat jaw, n chye n chyang, n dum n hprang nga ai Jinghpaw Wunpawng amyu sha ni mungga nhtoi ningnan hpe hkap la kamsham nna, Kawa, Kasha, Chyoipra ai Wenyi hta myit malai hkalup hkam la ai chyeju mabyin hte hkalup shawng hkam la ai ji woi ji wa ni hpe myit dum nga let, shanhte hkan sa lai wa sai dai tengman ai lam hpe manu shadan kamsham hkan sa nga ga. Bai chyeju hkinghtawng hpring ai KBC Hkalup makam masham wuhpung hta sadi dung let kabu gara shanglawm let Karai Kasang a hpung shingkang hpe shadan sa wa ga law. Dai rai nna, sumsing lamu de hkrang shang wa sai hkinjawng agyi kabu ngu ai, Karai Kasang a kasha Yesu gaw anhte lu ga ai majaw anhte yin la ai nawku htung hta maju jung nga ga.(Heb 4:14) Ref: - Ja hte Lungseng Jubili Laika (Sara Myitung Sut Nau) - JHZ Labau (Rev. Marip Awng La) ( 59 ) LANG NA KBC MASAT NHTOI NAWKU LAMANG 1. Hpawng hpaw Chyum ga 2. Hpawng Ap Akyu hpyi na 3. Shakawn Mahkawn 5. KBC Amu Madu a Numhtet ga 6. Senhkum 8. Shana ra ai lam - Kasa 1:8 - No.(150), Yesu A Mungga Ndat Hta Kam Nga -

4. KBC Ningbaw Wa A Shakram Mungga-

7. KBC Masat Nhtoi Byin Wa Ai Labau Hti Na9. Gahti galai hti na - No. (33),Ahkrung Nga Ai Hkungga Nawng Ya Ai Lam 10. KBC Masat Laban Alu hta la na, akyu hpyi ap na 11. Hkum tsup akyu hpyi na ( Akyu hpyi na lam ka da ya ai hte maren )

12. Chyum Laika hti na 13. Senhkum

- Esaia 26:2-4; Mahte 25:14-30; Ehpesu 4:15, I Samuela 16:11-13 -

14. Mungga( Program kaw na ) KANGKA SADI DUNG AI HTE HKRISTU HTA KABA RAWT WA GA 15. Shakawn Mahkawn 16. Shaman ya na Amen ..... Amen...... Amen * Nawku lamang hpe tinang a Buga a masa hte jahtuk lang ga. - No. (406), Ji WA Ni A Makam

KANGKA SADI DUNG AI HTE HKRISTU HTA KABA RAWT WA GA Growing in Christ through Faithfulness Esaia 26:2-4; Mahte 25:14-30; Ehpesu 4:15, I Samuela 16:11-13 Ga nhpaw Dai ni anhte shanu nga ai mungkan gaw tinang a galaw lu ai n gun atsam hta kam hpa nna galu kaba wa na shakut nga ai re majaw kangka sadi dung ai ngu ai myit jasat ni hpe mu lu na grai taw mat sai. Kangka sadi dung ai ngu ai gaw madu kam hpa ai lam hpe kam sham ai myit jasat myit manaw nga ai hte dai kam sham ai myit hte galaw gun hpai ai ngu lachyum shapraw lu ai zawn kangka ai hpe ram ai, byin ai, kam ging ai ngu mung chye na lu nga ai. Karai Kasang a kashu kasha jet ai hku asak hkrung ai lam hta Karai Kasang hpe ningshawng jaw, tingnang a htingbu wa hpe tinang hkum hte maren tsawra myit tawn chye ai Hkristan ni a matu myit maju jung, sadi sahka tawn ra ai myit jasat gaw kangka sadi dung ai myit nan re. I. Kangka sadi dung na Yesu sharin ya ai. Yesu ga shadawn hku sharin ai Chyum Laika Mahte 25:14-30 gaw kangka sadi dung na lam hpe madung sharin ai re. Hpang jahtum na aten hta shagrau hkrum na shing n rai, jeyang hkrum na hpe chye shangun nga ai. Mahte 25:14-30 hpe yu yang:- Masha langai mi bu hkawm na hkyen yang mayam masum hpe shaga la nna langai mi hpe gumhpraw joi manga, langai mi hpe lahkawng hte langai mi hpe joi mi di nna, shanhte a atsam hte maren ap ya nna bu hkawm mat wa ai. Tawng marang na ai hpang dai madu bai du wa nna shanhte kaw ga jahpan la yang, gumhpraw joi manga hte lahkawng lu ai yan gaw madu ap ai gumhpraw hpe arang shatai nna hpaga ga ai majaw ap ai arang daram amyat lu wa ai hpe arang hte amyat lang nna madu hpe wa ap ma ai. Madu mung Ara, kaja ai hte sadi dung ai mayam e: arai loi sha hta nang kangka rai nit dai; arai law law a ntsa e ngai nang hpe san tawn da na de ai: na a madu a kabu gara ai hta shang lawm u ngu nna shan lahkawng yan hpe tsun shakawn ai. Joi mi arang lu ai wa gaw madu hpe hkrit ai majaw gumhpraw hpe ga hta e lup da ai nga nna dai joi mi hpe sha la wa yang madu gaw N hkru ai hte lagawn ai mayam e ngu nna shi a gumhpraw joi mi hpe la kau nna, joi shi lu ai wa hpe jaw kau

shangun ai hte dai n hkaw ai mayam hpe shinggan na nsin sin ai de shaden kau na jeyang ai. Ndai chyum mungga kaw na sharin la lu ai lam masum hpe mu lu ai. 1. Anhte gaw Karai Kasang a kunhting ni re. Anhte a asak aprat hta hkam la lu ai rudi ruhpang, myit nyan atsam yawng mayawng gaw Karai Kasang a chyeju hte ap da ai, jaw ya ai hpe hkam la ai sha re. Yawng mayawng hpe Karai Kasang madu ai majaw n gat ai shara na ngai dan la ai hte, n-ayai ai shara na ngai magawn la ai nga ka da nga ai. Anhte madu ai hpa nnga ai hta n-ga Karai Kasang lajang ya ai arang hpe amyat hte hpawn Karai Kasang hpe bai ap ra ai. dai majaw nye a gumhpraw hpe boi ai shara hta nang tawn da lu na rai ndai; ngai bai wa yang she nye a arang hte atu hpe bai la lu na we ai. (Mahte 25:27) 2. Karai Kasang a kunhting kaja tai, kangka sadi dung ai ni rai ra ai. Shinggyim masha hpe ningnan hpan ai kaw na kashu kasha shaprat mayat maya wa na, ga ting hpe jahpring nna up na, nammukdara hta rawng ai nga ni, ntsa malen e pyen ai u ni, ga ntsa ting hta nsi naisi li rawng ai nai man amyu shagu jaw ya ai gaw Karai Kasang anhte hpe ap ai arang, lit ni rai nga ai. Dai lit ni hpe Karai Kasang hpe madat mara ai hte gun hpai ra ga ai. Kunhting kaja tai ai gaw lu ai arang hpe ga hta makoi lup da na matu nre. Myit nyan atsam shapraw nna lu ai arang, galaw ra ai lit ni hpe jat wa hkra, awng dang hkra kang kang ka ka gun hpai shakut ra ai re. Lu ai wa kadai hpe mung, naw jaw nna shi law htam wa na ra ai: n lu ai wa kaw na chyawm gaw, shi lu malu hpe pyi naw shaw la na ru ai. (Mahte 25:29) 3. Karai Kasang kaw na jahpan sanglang shangun na aten du na ra ai. Lagawn nna, sum na hkrit nna, mara shagun hkrum na hkrit nna hpa mung n galaw ai hpe Karai Kasang nra nga ai. Gumhpraw joi mi lu ai wa jeyang hkrum ai gaw shi galaw shut nna nre, hpa mung n galaw ai majaw re hpe mu lu nga ai. II. Karai Kasang gaw kangka sadi dung ai. Yesu a ga shadawn gaw Hkristan ni hpe asak hkrung hkawm sa lam yawng hta kaja dik ai hku galaw gun hpai na hte kangka sadi dung na hpe ga shadawn hte sharin ai re. Hpa majaw nga yang Kawa Karai Kasang gaw kangka sadi dung ai majaw kasha ni mung kangka sadi dung na hpe ra sharawng ai lam Yesu chye ai majaw re. Kangka sadi dung ai gaw Karai Kasang a shingkang shingwang atsam ningja langai re. Karai Kasang hpe kangka re ai Karai Wa (Tara Jahprang 7:9) ngu Chyum Laika hta madun da nga ai. - Yehowa a ga ding man nga ai,Shi a amu nlang hte gaw kangka rai nga lu ai (Shk. 33:4), - Shi tara dara ai lam ni malang nga ai (Shk. 119:137), - Shi a hpaji daw ai lam ni kangka ai hte tengman ai rai nga ai (Esaia 25:1) - Anhte kangka n rai lu timung, shi gaw kangka rai nga ai, kaning rai nme law, shi gaw shi hkum dai ndang kau lu ai n rai (2Tim.2:13) ngu ka da nga ai. Yesu Hkristu mung Kawa Karai Kasang a kangka ai hpe shangang shakang tsun sharin ya ai hpe mu lu nga ai. Karai Kasang gaw n kaja ai ni hte kaja ai ni a ntsa e, shi a jan hpe shi pru shangun nga ai, ding hpring ai ni hte n ding n hpring ai ni a ntsa e,

marang jahtu ya ai lam (Mahte 5:45), shi a myit ra ai hte maren galaw ai wa hpe bai htang ya na lam (Mahte 6:4) sharin ya nga ai. Kasa Pawlu shagun ai laika ni hta mung Yesu Hkristu hta Karai Kasang a hpung shingkang arawng sadang hpaw hpyan dan sai hte maren Yesu Hkristu hta kangka sadi dung na hpe Karai Kasang ra sharawng nga ai lam (Ehpesu1:1, Kolose 1:1), Shi a masha ni hpe n jan lu ai agung alau n hkrum shangun na ga sadi jaw ai hpe (1Kor. 10:13)hta ka da nga ai. III. Karai Kasang hpe kangka sadi dung ra ai. Kangka sadi dung ai Karai Kasang hpe kam sham lu ga ai hpe Chyum Laika kaw na sharin ya madun ya nga ai re. Hkristan ni gaw Karai Kasang hpe mung Yesu hpe mung kangka sadi dung ra ga ai. Kam sham ai ngu hkam la yin la ga ai raitim shani shagu ta tut asak hkrung lam hta Karai Kasang hpe nyet kau ai, Karai Kasang awng sharawng ai hku asak n hkrung chye ga ai. Yak hkak jam jau hkrum yang, tinang a nga mu nga mai lam hpe tat kau, sum kau ra wa yang Karai Kasang hpe shingdu yin kau chye ga ai. Ngai hta kaga Karai Kasang shaje hpe hkum naw hkum ku et, hkrang hte bung ai sumla hkum galaw, hkum nawku, hkum jaw ngu ai Karai Kasang jaw ai Jep ai Tara gaw Shi hpe sha nawku shangun mayu ai, kaga hpa hpe mung Shi a shara hta n jaw na hpe ndat ai lam re. Hpa majaw nga yang Karai Kasang shi chyu sha Karai Kasang rai nna, Shi chyu sha karum lu ai, jaw ya lu ai, hkye la lu ai hpe chye shangun mayu ai re. Hkristu a hkringmang ni hte Karai Kasang a sung htum ai lam ni a kunhting tai na (1Kor.4:1), Hkristu a hpyen ma kaja zawn, ru tsang jawm hkrum ai hte hpyen amu gun hpai na (2Tim.2:3) Karai Kasang ra sharawng nga ai hta n-ga, Nanhte nye a ga shaka hkan myit yang gaw, masha amyu nlang hte hta na nanhte nye a sali wunli tai na ma rin dai (Pru mat19:5) ngu ga sadi jaw nga ai re. Dai majaw Karai Kasang hpe kam sham ai, Karai Kasang a ga shaka hkam la ai ni hku nna, Karai Kasang hpe kangka sadi dung na lit lu ga ai. Karai Kasang a hkringmang zawn, hpyen ma zawn, mayam zawn, kunhting zawn Karai Kasang shabyin ai amyu, jaw ai magam bungli, mungdan, yawng mayawng hta kangka ra ga ai. Karai Kasang hpe kangka sadi dung ai majaw anhte a asak hkrung lam yawng hta kangka wa lu ai. Asak hkrung lam yawng hta kangka lu na matu gaw Karai Kasang hpe kangka sadi dung ai hta ru jung n pawt de ra na re. Shani shagu hkrum katup ra ai asak hkrung lam hta Karai Kasang hpe kangka nga ai hpe madun lu ai lam n kau mi hpe yu yang: 1. Nawku hpung hpe kangka sadi dung ra ga ai. Nawku hpung hpe kangka sadi dung ai ngu ai gaw Yesu hpe kam sham ai hpung masha ni hpawng nga ai wuhpawng hpe kangka sadi dung ai rai nga ai. Dai wuhpawng gaw Hkristu a hkum hkrang rai nna, Hkristu a asai hte mari da ai hpe myit dum ra ga ai. Anhte a zuphpawng ai lam hpe n koi n kau na (Hebre 10:25), Hkristu a daw shan ni shada da tsaw ra ai hta de shatup ra nga ai. (1Kor.12:25-27, Eph.4:16). Yesu Hkristu a magam bungli matut gun hpai ai hte Karai Kasang gaw de mayu ai Sumsing mungdan hpe nawku hpung gaw kasi madun woi gaw gap ai hte kangka sadi dung ra nga ga ai. 2. Dinghku nta masha ni hpe kangka sadi dung ra ai.

Karai Kasang kangka sadi dung ai zawn dinghku nta masha ni kangka sadi dung hkat ra ai. Ma ni kanu kawa ga sadi dung na grai kam ai hte maren kanu kawa ni mung kashu kasha ni madat mara na hpe grai ra sharawng ma ai. Dinghku num dinghku la ni kangka sadi dung na ahkyak dik ai zawn, kanu kawa hte kashu kasha ni a lapran, bungli madu hte bungli galaw ai ni, jinghku jingyu, kahpu kanau ni shada da kangka sadi dung yang lam shagu hta manghkang nnga myit pyaw ai hte galu kaba wa lu na re. (Ehpesu.5:33-6:9) 3. Karai Kasang hpan da ai yawng mayawng a ntsa e kangka sadi dung ra ai. Anhte hkam la lu ai yawng mayawng gaw Karai Kasang jaw ya ai chyeju ni hkrai re. Anhte a bungli, dum nta, amyu masha, ja gumhpraw, hpun kawa, hka shi hka nu, makau grup yin yawng mayawng hpe kangka sadi dung let nga ra ai, jai lang ra ai, akyu byin hkra galaw ra ai re. Shi ap da ai, jaw da ai lam ni hta kangda sadi dung ai hte Karai Kasang hpe shagrau chyeju dum ra nga ai. (Luka 16:13, Kolose 1:16, 3:23-24) Ga Hpungdim Li baw shatawng jang li mai kanang ahtu yang ahtu ngu ai tinggyeng myit jasat nga ai ni a matu kangka sadi dung na lam n mu lu na re. Raitim, kaning re ai mabyin masa grup yin ni kaw raitim kangka sadi dung ai Karai Kasang hpe kam sham ai ni a matu gaw myit mada lam nga ai hte lam shagu hta kaja dik ai hku myit mang, kaja dik ai hku asak hkrung na re. Yak hkak ai, jam jau ai machyi hkam ra ai aten ni hta mung kangka sadi dung asak hkrung ai rai yang Madu a kabu gara ai hta shang lawm u ngu nna Karai Kasang a saw shaga ai hkrum na ga ai. Chyeju myit hte kangka re ai myit hkum kau da et; Dai hpe na a du hta gali nga u, Na a kraw lawang lungpa hta tawk ka da u Ga Shagawp 3:3 Kangka re ai wa gaw, shaman ai chyeju law lu la na ra ai; Alawan sut su mayu ai wa chyawm gaw, yubak lawt na, n rai. Ga Shagawp 28:20 Si hkra maju jung nga u, shaloi ngai nang hpe asak janmau jaw na de ai. (Shingran 2:10b) Saranum Ja Hpang Yangon J.W Hkalup Hpung Lawu Ga Ginwang

(59) LANG NA KBC MASAT LABAN NAWKU LAMANG hta LAKSAN AKYU HPYI SHALAWM RA AI LAM NI 1. KBC Hpung magam gun ni hte Hpung masha ni yawng a shut hpyit ai yubak mara ni hpe hpyinem tawngban na. 2. Daini du hkra Jinghpaw Wunpawng sha ni hpe tsawra let awng padang jaw woi awn nga ai Karai Kasang hpe chyeju shakawn na. 3. Hpyen majan a majaw tinang buga dum nta, lu malu mahkra hpe kau da nna hprawng yen nga ai hpung masha yawng a matu.

4. Hpyen koi yen nga ai hpunau ni hpe lam amyu myu hku nna, lakawn lanawn nga ai nawku hpung ni hte wuhpung wuhpawng ni a matu (mungdan kata/mungdan shinggan). 5. KBC Ginjaw magam dap hte magam gun ni, Ginwang 15 hta woi awn nga ai ningbaw ningla ni yawng a matu. 6. KIA/KIO hte Myen mungdan asuya a simsa lam jahta ai hta, tengman ai Karai Kasang gaw woi awn ya na matu. 7. Lai wa sai ten ni na zawn masu magaw, hkalem hkalau ai bai n hkrum u ga, myusha ningbaw ningla ni Karai Kasang hpe manoi manat let mung masa lam yan hta woi awn lu na matu. 8. Katsi majan hku anhte hkrum hkra nga ai Nanghpam lusha hpe koi gam lu na hte, Chyoi pra Wenyi atsam hte gasat shamyit kau lu na matu. 9. Kade nna yang galaw sa wa na Myen Mung Asuya a yuptung jahpan gaw KACHIN ngu ai hpe shaw la kau mayu ai ai bandung re majaw, anhte wunpawng sha ni yawng KACHIN kaw chyu sha myit hkrum sa wa lu na matu. 10. (37) lang na KBC Hpung Shawa Zuphpawng a matu (Uru Sengmaw Ginwang, Zup Ra Buga Hpung kaw March 27-30 du hkra galaw na) 11. KBC Hpung masha ni yawng Hkristu hta npawt gaw de nna lam shagu hta galu kaba rawt jat wa na matu. 12. KBC a Sasana magam ni (1) Mungkan A Ninghtoi Sasana hku nna Nanghpam pat jasan magam hta woi awn galaw nga ai, KBC Ginjaw hte Ginwang ni a matu. (2) Hpyen yen dabang ni hpe karum kahtau ai lam hta woi awn nga ai Ra Ahkayk Hpyen Yen Komiti hte Sub-Komiti ni a matu. (3) Mali Hku Ginra Shapan Sasana (Putao-Nogmung) (4) Uma Ginru Ring Sasana(Hkahku Mung) (5) Laika Hpaji Sasana (6) Wa, Rahkaing, Sinpraw Hkran Sasana ni a matu. (7) Shamai Shatsai Sasana (8) Sharin achyin, shakung shapan magam bungli. (9) Shinggyim nau na sasana masing hku sasana ginra ni hpe lit la nga ai buga hpung ni, Ginwang ni a matu. (10)Maigan de du nga ai KBC Hpung masha ni hpe matut mahkai lanawn lakawn masing (Oversea Kachin Baptist Network) 2010 2014 LAMAN NA KBC GINJAW MAGAM GUN NI 1. Ningbaw - Rev. Hkangda Tu Lum 2. Ningtau Ningbaw (1) - Rev.Chyang Maja Tu Shan 3. Ningtau Ningbaw (2) - Dr. Jinghkang Kaw Bu 4. Amu Madu / Ningbaw Ningla Shalat Komiti - Rev. Dr. Hkalam Samson 5. Kunhting / Sut Dap Hpa-awn - Rev. Lahpai Htoi Bawk 6. Kabu Gara Shiga hte Sasana Dap Hpa-awn - Rev. Lahpai Ja Naw 7. Hkristan Hpaji Dap Hpa-awn - Saranum Maran Nang Shan 8. Hpung Sara Komiti Hpa-awn/NT Amu Madu - Rev. Qidnang Dau Gyung

9. La Komiti Hpa-awn - Rev. Hpaugan Tang Gun 10. Num Komiti Hpa-awn - Saranum Marip Bawk Mai 11. Ramma Dap Komiti Hpa-awn - Sara Nhkum Tang Gun 12. KTC Trustee Ningbaw - Srn. Lahtaw Ja Nan 13. KTC Jawng Up - Rev.Dr.Nalaw Dai Hkawng 14. Laili Laika Komiti Hpa-awn - Rev. Mading Hkaw Bawm 15. Hanson Htang Dip Gawng Hpa-awn - Rev. Lalawk Gyung Hkawng 16. Labau Mazing Komiti Hpa-awn - Rev. Maji La Wawm 17. Ngwi Pyaw Simsa Lam Tam Komiti Hpa-awn - Rev. Dr.Saga Hkyen Naw 18. Shamai Shatsai Sasana Komiti Hpa-awn - Srn. Zahkung Seng Ja 19. Mu Na Kyithkai Dap Hpa-awn - Rev. Lama Yaw 20. Music Komiti Hpa-awn - Sara Mangkyi Hkawng Lum 21. Karum Kahtau Komiti Hpa-awn - Rev. Kumshin Bawk Naw 22. Karai Masa Komiti Hpa-awn - Rev. Dr.Maran Sing Gawng 23. Buga Bawngring Sasana Dap Hpa-awn - Sara Zinghtung Kum Shawng 24. Chyum Jawng Zinlum Dap Hpa-awn - Rev. Labya Paul Naw Tawng I. DAINI NA MABYIN MASA LAM NI 1. Lahkawng ning jan laja lana gap hkat ngut ai hpang, gap hkat jahkring na matu shakut nga ai kaw, daini anhte ginra nkau mi hta matut gap hkat ai lam ni byin nga ai. 2. Myo kata Nawku Hpung ni hta shingbyi nga ai hpyen yen ni hpe n wa n mai, sen htu shangun ai lam ni, jahpan hta la ai lam ni, lang hte lang uphkang rung kaw na galaw nga ai majaw hpyen yen ni, myit daw myit hten byin nga ai. 3. Majan yawm mat ai majaw mungkan a karum ai lam ni yawm mat wa ai hte, buga de bai wa na mahkyen ni hta grau madung dat wa ai. 4. Miwa jarik hte myo kata nga hpyen yen ni gaw yakhkak ai law law nga tim masa lam nsan shi ai majaw hkam sharang nga ai hpe mu lu ai. 5. KBC Ginjaw de tara shang sa du ai, British hte American ni gaw wunpawng sha ni a mabyin masa ni hpe atsawm sha chye na ai majaw, anhte hpe n-gun jaw nga dingyang re. KACHIN hte seng ai lam 1. KBC gaw wunpawng sha ni rai nga ai, Jinghpaw, Loahvo, Kachid, Zaiwa, Rawang, Nung Lungmi, Ngo Chang ni shanglawm ai Hkalup Hpung Ginjaw re. 2. Mungkan de matut mahkai ai hta yawng gaw Kachin ngu ai hku matut mahkai nga ai gaw daini du hkra re. Sasana Sara ni shamying da ya ai mying re majaw chyeju hkinghtawng lawm nga ai. 3. Ya Myen Asuya gaw yuptung jahpan hta nna anhte hpe bra ayai kau na hku maw lanyet galaw nga sai hpe dum ga. Anhte wunpawng sha ni a kata hta tinang a bawsang amyu ga hte laili laika ni hpe shagreng wa ga, mungkan lahkam hkam sa wa na hta KACHIN ngu ai hku sa ga.

4. Asuya gaw yuptung jahpan hta ai hpe mung masa n lawm ai nga tsun nga ai. Kaja nga yang yuptung jahpan gaw mung masa a npawt hkridun rai nga ai. Dai majaw anhe ni yawng, mung masa ningmu hte kachin ngu ai kaw sha jawm ka bang ga. Makam masham lam 1. KBC gaw hkalup makam hpe kamsham ai sha n-ga, jiwoi jiwa ni a hkinghtawng hpe mung, gaw shachyaw ai ni re. 2. KBC gaw anhte a makam hkinghtawng hpe tinang a amyu htunghking hte hpawn woi sharawt nga ai nawku hpung ni re. 3. Hkum dingnum sasana masa hte woi awn nga ai KBC re. 4. Buga Hpung hpe madung dat let sasana galaw ai ni re. Dai majaw Ginjaw ru pawt n nga ai makam mahkam hpung ni hte Sara ni hpe grai sadi ga. 5. KBC a makam gaw amyu sha lam mayan hte htinghking lawm ai makam re. Hkristu hta amyu sha lam mayan n nga ai hku hkaw tsun sharin ai gaw anhte hpe shabra ai ni re hpe dum ga. II. OVERSEA KBC HTE SENG AI LAM 1. Maigan de du nga ai KBC Nawku Hpung ni hte hkrum zup ai lam 2013 ning August shata hta Bangkok kaw (1) lang galaw lu sai. Ndai zawn hkrum zup ai majaw Kanu mungdan KBC hte adingtawk matut mahkai let sasana magam bungli galaw nga saga ai. 2014 ning hta mung Thai Mungan Chaingmai kaw (2) lang ngu na hkrum zup ai lam bai galaw na hkyen nga ai. YUDATAN 200 ning Masat 1. Yudatan 200 ning masat hpe KBC hku nna Yangung Buga Hkalup Hpung (YJH) kaw Dec 2-4, 2013 ya shani galaw lu sai. Hpung masha ni 13000 du sa ai hpe mu lu ai. Karai Kasang a mungga hpe hpung masha ni grai ra sharawng hkamla ai hpe mu lu ai sha n-ga, myusha lam mayan hta mung grai myit hkrum ai hpe mu lu ai. Kachin ngu ai hta yawng myit hkrum ai hpe lu la sai. Alu lap sen 700 ram ngam ai lam chye lu ai. 2. MBC (Myen Mung Hkalup Hpung Ginjaw) Yudatan 200 ning Masat hpe December 57, 2013 hta Yangon Kayin Hkalup Hpung wang kaw galaw ai. KBC ni hpung masha ni law dik re hpe chye lu ai. Mying jahpan bang ai KBC hpung masha yawng 14000 re. Anhte KBC Hpung masha ni jaw bang ya ai alu law dik re. Alu lap sen 14000 hte ja lungseng arung arai ni ngam ai lam chye lu ai. Grau nna Myen Mung Hkalup Hpung masha ni yawng Karai jaw ai awmdawm anhte ginra hta dik wa u ga kyu hpyi ya sai. American Hkalup Ginjaw kaw na ni hte anhte KBC ni hkrum lu ai sha nga, hpyen yen 500 ram hte mung laksan hkrum lu sai. KBC GINJAW MAGAM DAP NI A BUNGLI NI
1. Sut Dap (Hpa-awn - Rev. Lahpai Htoi Bawk) (1) Moi na KBC Rung dingsa run kau nna 100 ning ninghtang hpung masat gawknu foundation jahkrat na jin nga sai. (2) KBC Sut Masing hpe grau awng dang hkra galaw nga ai. 2. Hkristan Hpaji Dap (Hpa-awn, Srn. Maran Nang Shan)

(1) Hpung Jawng sharin Laika(Text Book) ni hpe pang hte pang na dip shapraw nga ai. Masat nhtoi ni hpe aten dep shabra nga ai. Shani shagu na lusha laika buk galaw nga dingyang re. (2) KBC hta nga ai ECCD Ginra 625 hpe grau madang tsaw hkra woi awn nga ai. 3. Kabu Gara Shiga hte Sasana Dap (Hpa-awn- Rev. Lahpai Ja Naw) (1) Sasana ginra ni hta awngdang hkra shakut nga ai. (Makedoni Sasana, Uma Ginru Ring, Rahkaing Sasana, Sinpraw Hkran Sasana, Mali Hku Ginra Sasana) (2) Mungkan A Ninghtoi Sasana (Nanghpam lusha hpe mungga sharin nna dawn ai masing) 4. Hpung Sara Komiti (Hpa-awn - Rev. Qidnang Dau Gyung) (1) KBC Magam Shachyen bungli masing. (2) Hpung woi ni hpe atsam shajat sharin achyin gawan gatsan masing. 5. La Komiti (Hpa-awn - Rev. Hpaugan Tang Gun) (1) Lanam Chyum sharin hpawng (2) Gawan katsan bungli 6. Num Komiti (Hpa-awn - Srn. Marip Bawk Mai) (1) Amyu Shayi Zinlum magam bungli (2) Samari tsi gawk madang sharawt bungli (3) Gawan katsan bungli 7. Laili Laika Komiti (Hpa-awn - Rev. Mading Hkaw Bawm) (1) Nawku shakawn mahkawn buk ndum hprut hkra galaw na. (2) Translation bungli ngut kre hkra galaw ai. 8.Hanson Masat Htangdip Gawng Komiti(Hpa-awn,Rev.Lalawk Gyung Hkawng) (1) Htangdip Gawng dum nta gawgap ai lam. (2) Jak ni hpe madang tsaw hkra jahkum wa sai. 9. Labau Mazing Komiti (Hpa-awn - Rev.Maji La Wawm) (1) Labau hte seng ai arung arai jahkum ai. (2) 100 ning jaw masat labau laika buk hpe dip shapraw na. 10. Shamai Shatsai Sasana Komiti (Hpa-awn - Srn. Zahkung Seng Ja) (1) Hkam kaja npawt nhpang sharin hpawng galaw nga ai. (2) Hpyen yen dabang de tsi mawan ni du hkra galaw nga ai. 11. Mu Na Kyithkai Dap (Hpa-awn - Rev. Lama Yaw) (1) KBC Website de shiga update bang nga ai. (2) KBC Nsen shata (4) kalang shapraw nga ai. 12. Karum Kahtau Komiti (Hpa-awn - Rev. Kumshin Bawk Naw) (1) Hpyen yen hte seng ai magam bungli hta shanglawm karum shingtau ai. 13. Ngwi Pyaw Simsa Lam Tam Komiti (Hpa-awn-Rev.Dr. Saga Hkyen Naw) (1) LBC ni hte mahkrun jaw jaw matut mahkai lu na matu lam tam nga ai.

(2) MBC 200 ning chyeju shakawn hta shanglawm mayu ai KBC hte hka garan nga ai hkalup Hpung masha ni hpe poi lawm lu na matu lam tam ya na. 14. KTC, Nawng Nang (Trustee Ningbaw - Srn. Lahtaw Ja Nan; Jawng Up, Rev.Dr. Nalaw Dai Hkawng) (1) Liberal Art program hpaw sai. (2) Main building ngut kre maga de rai sai. 15. KTC, Kutkai (Trustee Ningbaw- Hpt. Lasang Brang Nan, Jawng Up- Rev.Dr. Maran Sing Gawng) (1) Chyum Jawng hpe madang sharawt sa wa na. (2) B.Min program hpaw ai. 16. Karai Masa Komiti (Hpa-awn - Rev. Dr. Maran Sing Gawng) (1) KBC a Karai Masa Hkridun shapraw lu sai. (2) Karai Masa Journal shapraw na hkyen nga ai. 17. Buga Bawngring Sasana Dap (Hpa-awn - Sara Zinghtung Kum Shawng) (1) Hkauna Jawng hpe hpaw nga dingyang re. (2) Hkai Rem masing hte seng nna Israel de masha dat ai. (3) Hpyen yen dabang ni kaw kanbau bungli sharin masing galaw na. (4) Israel mungdan de hkai sun hpaji sharin, bungli galaw masha dat nga ai. 18. Ramma Komiti (Hpa-awn, Sara Nhkum Tang Gun) (1) Gawan katsan bungli galaw ai. 19. Music Komiti (Hpa-awn - Rev. Mangkyi Hkawng Lum) (1) Bethlehem (USA) de marai (17) sa du nna Music lekmat lu la sai. (2) Hpyen yen tsinyam DVD pru sai (KACHIN EXODUS). 20. Chyum Jawng Zinlum Dap (Hpa-awn - Rev. Labya Paul Naw Tawng) (1) Israela de Holy Land Tour galaw nga ai. 21. Ningbaw Ningla Shalat Komiti (Hpa-awn- Rev.Dr. Hkalam Samson) (1) Dap-Komiti ni de matut mahkai ya ai network galaw ai. (2) Hope International hte ta gindun let shalat ai bungli galaw ai. Matut galaw na magam bungli ni 1. Overseas Kachin Baptist Network hpe dam lada wa hkra hkrang shapraw na. 2. Mungkan A Ninghtoi Sasana Jawng nanghpam pat jasan masing hta kanbau hpaji sharin jawng lawm hkra galaw na. 3. Ninghtan Hpung 100 ning masat building hpe ngut kre hkra galaw sa wa na. 4. Hpyen hprawng nu wa hpung masha ni hpe woi zinlum nga na, makawp maga na. 5. Wunpawng sha ni a awng padang hkrunlam hta Karai Kasang woi awn ai lam hpe shadan shaleng na, akyu hpyi na.