Nhtoi: 9/6/2014

Dai ni na nhtoi gaw Wunpawng Mung dan Shang Lawt Hpung/ Shang Lawt Asuya, Wunpawng
Mung dan Shang Lawt Hpyen Dap hte hpawn, jet ai hpedare tara rap ra lam a matu gasat majan shang nga
ai ni hte mung maden Myen hpyen ni a lapran majan gasat hkat ai ning htoi ladu hkrum ai shani rai nga
ai. 2011 June shata 9 ya shani kaw nna majan bai byin hpang wa ai gaw daini 2014 June shata 9 ya hta
ladu hkrum ai nhtoi rai nga mali ai.
Anhte mung masa yu maram hpung a mu mada hkam la lam hpe ndai ndau laika hte hpawn tang
madun dat lu ga ai. Myen hpyen asuya gaw, hpa mara n-nga ai anhte mung chying mung shawa masha ni
hpe sat nat zingri zingrat re lam gaw ding yang rai nga ai. Ndai zawn mara n-nga ai mung chying sha ni
hpe dip rip ai lam gaw anhte mung chying mung shawa masha a kaba htum ai hkrat sum lam ni rai nga ai.
Tara rap ra ai lam hpe shingdu tawn ai Myen hpyen gum shem lai masa kata hta, anhte mung chying
mung shawa masha ni a sut masa lam, hpaji lam, shinggyim nga pra masa hte seng ai shim lam, tinang a
dinghku dum nta a sak hkrung nga lu na matu gyin shalat bungli hkrat sum mat ai lam, shinggyim nga pra
masa lam hta nlu nmai, n-nga nmai rai nga ai awm dawm hkawm sa hkawm wa lam, myu shayi ni a shim
lam hte kaga hkrat sum lam law law hte hkrum katut sha nga ga ai.
(1) 2011 June shata majan byin hpang wa ai kaw nna dai ni du hkra, mung chying kasa wuhpung
rai nga ai (Civil Society Group), myu shayi hpung, ramma hpung hte kaga NGOs wuhpung
wuhpawng ni a jahpan hta Jinghpaw mung hte Sam mung kata hta tsinyam masha marai
130,000 Jan du taw nga sai re hpe yawng chye tawn chyalu rai nga ga ai. Ndai zawn mung
dan kata hta tsinyam masha ni law law yak hkak jam jau hkrum sha ai hta sha n-ga shinggan
mung dan de mung anhte myu ni tsinyam masa hku nna hprawng shanu mat ai ni mung law
law rai nga ga ai. Anhte yu maram hpung a mu mada ai lam hta lahta kaw tang madun lai mat
wa sai hte maren ndai zawn yak hkak jam jau hkrum tsinyam tsin dam hkrum sha nga ai ni a
shawng lam hpe myit tsang hpa kaba hku nna mu mada chye na ga ai. Rai tim dai ni mung
maden Myen hpyen ni gaw mung masa hpe mung masa mahtai tam ai lam hpe ning shawng
ntawn ai sha Jing hpaw mung de hpyen n-gun jat bang nna jahkrit shama ai masa kum la hpe
chyu galaw nga ding yang rai nga ai. Ndai zawn re masa kum la ni gaw anhte mung chying
sha ni a matu ten galu hta hkrit tsang hpa kaba byin wa na hpe anhte mung chying wuhpung
ni hku nna tsep kawp nra sharawng ga ai.
(2) Demokresi lai ladat hpe mung masu magaw galaw nna, tara rap ra nna jet ai hpedare mung
dan langai byin tai lam hpe mung nra sharawng ai Myen gum shem hpyen a majaw anhte
myu ni hkrat sum lam grau kaba dam lada wa nna, lam magup hta tut dang ai prat a sak
hkrung lam rai nga ai wan numjang kaba hta hkru ganip ai majaw mung chying sak hkrung
lam hta ahkyak kaba ni rai nga ai hpaji lam, sut masa lam, kan bau makan lam hte seng ai
shim lam ni hpe hkrat sum mat nna ten galu shoichyum ai sak hkrung masa hta lup mat wa na
hpe nra sharawng ga ai. Dai majaw Jinghpaw mung kaw nga nga ai,mung masa kung kyang
ai mung masa pati ni, Wunpawng Mungdan Shang Lawt Asuya hte kaga myu sha wuhpung ni
yawng mung, ndai lam hpe lahkrip ra ra jawm myit mang nna mahtai tam na matu hpe ra
sharawng awng let myit mada nga ga ai.


(3) Lahta kaw tang madun mat wa sai lam ni yawng hpe majan byin hpang wa ai shani kaw nna
dai ni du hkra matut manoi ladat amyu myu hku nna shang lawm shamu shamawt nga ai
wuhpung wuhpawng ni yawng hpe mung, matut nna lajin mayu ai lam hta mung masa nrap ra
ai mang hkang a majaw byin pru wa nga ai shinggyim nga pra shim lam hte seng ai makan
lam shagu hta matut nna jawm shakut nga na matu myit mada ai lam hte, mai gan mung dan
shara law law hta du hkawm nga ai anhte myu sha kaji kaba yawng mung ndai lam hta myit
n-yup ai sha jawm myit mang nga na matu mung, myu sha ni yawng a sak hkrum shim lam a
matu tinang wuhpung wuhpawng a pandung hpe awng dang lam lu hkra ahkyak tawn ai
zawn, myu sha ting a shinggyim nga pra masa lam hte seng ai shim lam ni rai nga ai, hpaji
lam, bawng ring jawt jat lam, rap ra ai sak hkrung lam hpe rap rap ra ra chyawm nga chyawm
pra lu na matu galoi mung n-gun dat nga ai zawn matut nna n-gun dat nga na hpe mung kam
kaba myit mada nga ga ai.

(4) Kaba htum hpe dang lu na matu gaw myit hkrum lam rai nga ai hte maren, mung masa
wuhpung ni hte mung masa pati ni mung myit mang jawm shabawn nna, mung chying dat
kasa mying gang nna myu a matu shakut nga ai wuhpung wuhpawng shagu mung myit mang
shabawn let, ntara ai hpyen wa hpe ladat jaw jaw hte jawm ganawng, jawm shamyit, jawm
gum lang shaprai kau lu hkra shakut ga ngu nna tang madun dat lu ga ai law.

Anhte Jinghpaw Mung Masa Yu Maram hte Sawk Sagawn Hpung gaw mung masa hpung nrai
nga ai hte maren, mung maden hpyen rai nna tara rap ra lam hpe nra sharawng nga ai tai hpyen wa a maw
lanyet amyu myu hpe yu maram dinglik ai wuhpung langai rai nhtawm n-gun ja ai laknak hpe machyu,
mung shawa masha ni kaw nna ntara ai hte jahkrit shagyeng nna lu tawn ai ja gum hpraw n-gun, gum
shem sat lawat hte n tara ai lam hpe galaw nna, tinang hkrai arawng aya madu mayu ai, shinggyim ahkaw
ahkang hpe manu n-shadan ai gum shem asuya hpe ning hkap ai wuhpung langai rai nga mali ai.

Matut mahkai hkring dat
Ginjaw komiti
Eamil: kpmrn21@gmail.com
Thailand: L. Tang Gun
Tel: + 668 56 237 567
Malaysia: Yi Jawng Hkawng Lum
Tel: + 66 01 629 63110