Magandang hapon po sa ating mga tagapakinig dito sa ating palatuntunang Biyaya at Katotohanan.

Ito po ang inyong lingkod, si Pastor Romy Endaya, ang inyong makakasama sa isang oras ng
pamamahayag ng Salita ng Diyos.
Ang Biyaya at Katotohanan ay magkatuwang na ministeryo ng Grace Reformed Baptist Church ng
Calauag at Quezon at ng Grace Baptist Church ng Los Banos. Ang atin pong palatuntunan ay
naglalayon na maiparating sa inyo na mga mahal naming tagapakinig ang Mabuting Balita na ang
Diyos ay nahabag at lumingap sa kalagayan ng tao sa kasalanan at ibinigay ang Kanyang Bugtong na
Anak upang maging handog na pantubos. Na sa pamamagitan ng Kanyang dugo ay mahugasan ang
mga kasalanan ng sinumang tunay na sasampalataya sa Kanya at mapawalang-sala at magtamo ng
buhay na walang-hanggan. Tayoy naninindigan na ang tunay na Mabuting Balita ay hindi na ngayon
malinaw na naipapaliwanag ayon sa Biyaya at Katotohanan ng Salita ng Diyos, kung kayat ito po ang
adhikaing ating isinusulong sa ating palatuntunan. Ipangaral nang tapat ang Nag-iisang Ebanghelyo ni
Jesukristo. At naway maging pagpapala po sa inyo ang palatuntunang ito.
Kung kayo po ay mayroong mga katanungan o mga paksa sa Bibliya na nais ninyong talakayin
natin dito sa ating palatuntunan ay maaari po kayong mag-text sa 09192071328. Ilagay po ninyo ang
inyong pangalan at kung taga-saan kayo.
Ang Grace Reformed Baptist Church ay mayroon pong mga gawain tuwing Sabado at Linggo dito
sa Calauag. Pag Sabado po ay mayroon tayong prayer meeting alas-3 ng hapon. Pag Linggo naman:
may Sunday School tayo para sa mga bata, alas-9:15 10:15 ng umaga; panambahan, alas-10:45
12:00 ng tanghali; Bible Study, ala-1:30 2:30 ng hapon. Ang mga gawain pong ito ay ginaganap
natin sa 2nd Floor ng Mendoza Feeds Supply, dito sa Maharlika hi-way, Sta. Maria.
Mamaya sa pangangaral ni Pastor Noel Espinosa, ay pakikinggan natin ang unang mensahe sa
maikling seryeng Sanggol sa Sabsaban na pinamagatang Talaga Bang Sanggol?
Makinig po muna tayo ng isang magandang awitin.
Ipagpapatuloy po natin ang ating tinatalakay na paksa: ang pagka-Diyos ni Kristo. Sinasagot
natin ang alegasyon ng mga hindi tumatanggap sa katuruan ng Bibliya na si Jesukristo ay Tunay na
Tao at Tunay na Diyos. Ang iginigiit nila ay walang tahasang pag-aangkin si Jesus na Siya ay Diyos.
At ito ay totoo, hindi tayo makakakita sa Bibliya ng tahasang pahayag ni Jesus na: Oo ako ay Diyos.
Ito po ay sapagkat noong Siyay unang pumarito, Siyay nagpakababa bilang isang alipin. Sa Filipos
2: 6-8 ay mababasa natin: Na siya, bagama't nasa anyong Dios ( morphe = kung ano ang pagkaDiyos ng Diyos ay Siya ring pagka-Diyos ng Diyos ), ay hindi niya itinuring na isang bagay na dapat
panghawakan ang pagkakapantay Niya sa Dios, Kundi hinubaran Niya ang Kanyang sarili, at kinuha
ang anyong alipin, at naging katulad ng tao: At palibhasa'y nasumpungan sa anyong tao, siya'y
nagpakababa sa kaniyang sarili, na naging masunurin hanggang sa kamatayan, oo, maging sa
kamatayan man sa krus. Nang Siyay bumaba bilang Tagapagligtas ay hindi Siya pumarito para
ipangalandakan ang Kanyang karangalan bilang Bugtong na Anak ng Diyos, kundi para mamatay
bilang Kahalili ng makasalanan = bilang isang aliping walang karapatan. Iyon ang dahilan kaya wala
Siyang tahasang paggigiit na Hey Ako ay Diyos, igalang ninyo ako. Hindi po, kundi pagpapakababa
ang Kanyang ginawa noong Siya ay unang dumating.
Subalit kahit ganito na wala tayong mababasang tahasang pag-aangkin ni Jesukristo ng Kanyang
pagka-Diyos ay napakarami namang mga pahayag at mga salaysay sa mga ebanghelyo at sa mga sulat
ng mga apostol ang nagtuturo nang walang kaduda-duda ng pagaka-Diyos ng Panginoon. Tiningnan
na natin ang ilan. Titingnan naman natin ngayon ay ang salaysay ni Mateo ng tungkol sa

kapanganakan ni Jesus, kung paanong nagtuturo rin ito ng Kanyang pagka-Diyos. Mababasa natin ito
sa Mateo 1:18-25
Mat 1:18 Ang pagkapanganak nga kay Jesucristo ay ganito: Nang si Maria na kaniyang ina ay
nakatakdang ikasal kay Jose, bago sila magsama ay nasumpungang siya'y nagdadalantao sa
pamamagitan ng Espiritu Santo.
Sa mga Hudyo ang pag-aasawa ay 2 yugto: ang una ay ang pagtitipanang magpakasal, sa harap ng
mga piling saksi ang lalaki at babae ay nagtitipanang magpapakasal. Sa pamamagitan ng
pagtitipanang ito, ang lalaki at babae ay nagiging legal nang mag-asawa sa yugtong ito, bagamat ang
babae ay nananatiling nakatira sa kanyang mga magulang at pagkalipas pa ng isang taon bago sila
magsasama ng kanyang katipan. Nasa puntong ito sina Jose at Maria.
Bago pa dumating ang panahon na magsisiping sina Jose at Maria ay natuklasang nagdadalantao si
Maria at sinasabi sa salaysay na ito ay sa pamamagitan ng Banal na Espiritu. Sa Lukas 1: 34-35
Sinabi ni Maria sa anghel, Paanong mangyayari ito samantalang akoy wala pang nakikilalang
lalaki. At sumagot ang anghel sa kanya, Bababa sa iyo ang Espiritu Santo at lililiman ka ng
kapangyarihan ng Kataas-taasan. Kayat ang batang banal ay tatawaging Anak ng Diyos. Ang
ibig-sabihin ng wala pang nakikilalang lalaki ay wala pang karanasan sa pakikipagtalik, hindi pa
nasipingan ng lalaki. Kung kayat ang idinidiin dito ay ang soberanong kalooban ng Diyos sa
pagsasasinapupunan kay Jesus.
At makikita rin natin na binibigyang-diin dito ang pagka-Diyos ni Jesukristo, na bagamat Siya ay
isinapupunan at ipinag-dalantao ni Maria, Siya ay literal na Anak ng Diyos sapagkat Siya ay hindi
galing sa binhi ng isang lalaki kundi mula sa Banal na Espiritu mismo na isinapupunan ng birheng si
Maria. Bababa sa iyo ang Espiritu Santo at lililiman ka ng kapangyarihan ng Kataas-taasan. Kayat
ang batang banal ay tatawaging Anak ng Diyos. Ang punto ng sinasabi ng anghel ay: ang dahilan
kung bakit Siya tatawaging Anak ng Diyos ay sapagkat ang Banal na Espiritu at ang kapangyarihan ng
Diyos mismo ang nagsa-sinapupunan kay Jesus sa birheng si Maria na hindi nasipingan ng lalaki.
Itoy hiwaga na hindi kayang arukin ng isip ng tao. Sabi nga ni Pablo sa 1 Tim. 3:16 Walang
alinlangan, dakila ang hiwaga ng kabanalan: Ang Diyos ay nahayag sa laman, pinatunayang
matuwid sa Espirirtu , nakita ng mga anghel, ipinangaral sa mga bansa, sinampalatayanan sa
sanlibutan, tinanggap sa itaas sa kaluwalhatian.
Matt 1:19 At si Jose na kaniyang asawa, palibhasa'y lalaking matuwid, at ayaw ilagay sa
kahihiyan si Maria, ay nagpasiyang hiwalayan na lamang siya ng lihim. 20 Datapuwa't samantalang
pinag-iisipan niya ito, narito, ang isang anghel ng Panginoon ay napakita sa kaniya sa panaginip, na
nagsasabi: Jose, anak ni David, huwag kang mangamba sa pagtanggap kay Maria na iyong asawa:
sapagka't ang kaniyang dinadalang-tao ay sa Espiritu Santo. 21 At siya'y manganganak ng isang
lalake; at ang pangalang itatawag mo sa kaniya'y JESUS; sapagka't ililigtas niya ang kaniyang bayan
sa kanilang mga kasalanan.
Pansinin natin ang sinabi ng anghel kay Jose tungkol sa pangalang itatawag sa isisilang ni Maria:
Jesus. At ang dahilan kung bakit Jesus, ay sapagkat ililigtas Niya ang Kanyang bayan sa kanilang mga
kasalanan. Aling bayan ang tinutukoy? Ang Israel. Ang Israel ay ililigtas ni Jesus sa kanilang mga
kasalanan. Sa Lumang Tipan, kaninong bayan ba ang Israel? Kay Yahweh o Jehovah. Subalit dito,
kaninong bayan ang ililigtas sa kanilang mga kasalanan? Kay Jesus, sapagkat ililigtas Niya ang
kanyang bayan sa kanilang mga kasalanan Ano ang magiging kongklusyon natin dito? Si Jesus
mismo si Yahweh o si Jehovah. Alam po ba ninyo, na ang pangalang Jesus ay Griyego ng pangalang
Hebreo na Yehoshua o Joshua, na ang kahulugan ay si Yahweh ang Tagapagligtas.

Matt 1:22-23 At nangyari nga ang lahat ng ito, upang maganap ang sinalita ng Panginoon sa
pamamagitan ng propeta, na nagsasabi, Narito, ang dalaga'y magdadalang-tao at manganganak ng
isang lalake, At ang pangalang itatawag nila sa kaniya ay Emmanuel; na ang ibig-sabihin ay kasama
natin ang Diyos.
Dito ay mayroong isa pang pangalan na sinasabing itatawag kay Jesus: at ito ay Emmanuel na ang
ibig-sabihin umano ay kasama natin ang Diyos. Ang salin sa tagalog na kasama natin ang Diyos ay
galing sa Griyego: theos meta hemon . Ang literal na salin nito sa English ay God with us sapagkat
ang Emmanuel po ay 2 salitang Hebreo na pinagsama: immanu at el: ang immanu = with us; at ang
el ay God. With us God. Kasama nating Diyos o Diyos na kasama natin. Si Jesus ay Diyos na kasama
natin. At hindi bat ganito nga ang sinasabi ni Apostol Juan sa panimula ng kanyang ebanghelyo sa
Juan 1:1, at 14: Sa pasimula ay naroon ang Salita, at ang Salita ay kasama ng Diyos, at ang Salita
ay Diyos At nagkatawang-tao ang Salita at nanahang kasama namin at nakita namin ang Kanyang
kaluwalhatian, kaluwalhatiang gaya ng sa Bugtong na Anak ng Ama, puspos ng biyaya at
katotohanan.
Matt 1:24 At nagbangon si Jose sa kaniyang pagkakatulog, at ginawa niya ang ayon sa ipinag-utos
sa kaniya ng anghel ng Panginoon, at tinanggap ang kaniyang asawa; At hindi niya siya nakilala
hanggang sa maipanganak ang isang lalake: at tinawag niya ang kaniyang pangalang JESUS.
Ito si Jesus na ating Tagapagligtas, isang Tunay na Taong isinapupunan sa isang birhen nang hindi
sa pamamagitan ng binhi ng lalaki bagkus ay sa pamamagitan ng kapangyarihan ng Banal na Espiritu.
At dahil dito, Siya rin ay Tunay na Diyos, sapagkat Siya ang Bugtong na Anak ng Diyos na nang
pasimula ay kasama ng Diyos.