(63) NING HPRING JINGHPAW MUNGDAW NHTOI

GA SHAGAWP
(10th. January, 2011, Malaysia)

Maden seng ai ninghtoi kaja,

Chyurum sha ni hkrum zup du sa;
Myit hkrum lam hta n di n hka,
Kraw wang kata n ja n hpra;
Buga mungdan hte mung grai tsan,
Hpawng de ai gaw myu sha lam yan;
Jinghpaw Mungdaw Masat Nhtoi,
Padang Manau hkik hkam ai poi;
Bai du ra ai hkap tau hkalum,
Myit hkrum myit ra shada ginshum ga le i . . !

Shaning shagu ladu bai hkrum,

Daining na lang Kru Shi Masum;
Masat Ninghtoi Jinghpaw Mungdaw,
Padang Manau ndai Poi gaw;
Myitkyina Majoi Uma buga,
Shatapru Naura rudi tawn da;
Chyurum sha ni shareng shagrau,
Gumshem wa gaw jak lak chyinglau;
Chyurum sha ni salat she grit,
Gumshem wa gaw dukrung e htit, rai sai da yaw. . .!

Daini anhte sumtsaw sumtsan,

Tsasam buga maigan mungdan;
Sa du nga ai mabyin law law,
Labau hkrunlam sumru shachyaw;
Buga de mung nhtang myit dum,
Myu sha lam hta shada myit hkrum;
Myu sha ni a shadip jahpang,
Gumshem wa gaw sai chyup dingyang;
Chyurum sha ni sharung shayawt,
Gumshem wa gaw kabu manawt . . . rai taw nga sai . . !

Jiwa ni nan du daw sai hkaw,

Myu mungdan hpe du baw sak jaw;
N-gun mung dat salat mung hkrat,
Lu tawn da sai buga hkringdat;
Hkum tsup ngwipyaw Jinghpaw Mungdaw,
Hkrat sum nga sai daini chyawm gaw;
Maroi n ni masin n si,
Mau taw nga yang kaning n di;
Moi na labau bai naw sagawn,
Machyang n-gun bai naw gumhpawn yu saga . . !

Create PDF files without this message by purchasing novaPDF printer (http://www.novapdf.com)
 Asha sinpraw bum tsaw mayan,
Saphkung-Hpunggawn hka nu lapran;
Dailup daihpang myu sha zaw nawng,
Shingteng amying Jinghpaw Wunpawng;
Chyaloi prat hta Majoi Shingra,
Daini chyawm gaw mungkan hproi hkra;
Ginru lalam ginsa lahkam,
Chyam bra hkawm ai ta tut magam;
Mabyin gindai dinglik yu mai,
Jiwoi hkringhtawng makawp ra sai . . !

Moi na prat hta ningdi kau da,

Mali Hku Majoi hka deng buga;
Chyai Hku Majoi de mung bai nawt,
Hkrang Hku Majoi de mung bai htawt;
Tarung, Tawang, Tabyi, Tanai,
Saphkung, Mungmau, Tahkaw, Munglai,
Tayun, Talau, Mali, Hkrang, Hpungmai;
Nawnglut, Mungnyang, Uru, Htingnai;
Bum tsaw shagawng dam pa layang,
Jiwoi hkringhtawng shadip jahpang, rai nga sai law. . .

Mayu dama hpunau masa,

Dikru hkrum rai makawp maga;
Ntsin hka hpawk langai jawm lu,
Num jaw num ya shada jawm hku;
Mayam tai yu labau n nga,
Hkanse jaw ai maumwi n kra;
Tinang magam wa la htanbam,
Lai sai ten na labau ginlam,
Buga ninghtawn tam bram jahproi,
Ndai ten hta Myitkyina Majoi, rai nga mali ai. . .

Tsa ban ‘Shi Jahku’ htum wa mahka,

Jiwoi Mungdan dingda htumpa;
Chyau Myen la ni makawp n ngang,
British hpyen hpe ninghkap n dang;
Jarit nhpan ashep malawng,
Dip sha hkrum sai Jinghpaw Wunpawng;
Daini du hkra kyang dai n mat,
Sai chyup hkat ai lailen n tat;
Chyurum sha ni matsan chyaren,
Tsasam ni she up sha ginlen, nga masai . . .

Magrau grang ai Jinghpaw Wunpawng,

Share shagan kajai gumhkawng;
Yawng a ntsa sadi grai dung,
Gasat gala shagri grai kung;
Madat mara bungli kangka,
Ang ai lit hta mangan mung nga;
Manawn masham myit nan n rawng,
Dingman hpraw san Jinghpaw Wunpawng;
Create PDF files without this message by purchasing novaPDF printer (http://www.novapdf.com)
 Hkawhkam wa a magam gunhpai,
Mungkan a man kasi tai sai . . .

“Hkun” lang ngu na tsa ban ladaw,

Mungdan shagu manghkang sumbaw;
Hkawseng mungdan jan pyi n shang,
British ni hkrai mazang n dang;
Jamani la ni majan shabyin,
British ni a shoihpa gumdin;
Jinghpaw la ni rawt htim adawt,
Masawp Amya mungdan de hprawt;
Masat Langai Mungkan Majan,
Jinghpaw ni she mahtai dawdan, lai wa sai. . .

“Hkun” lang ngu na tsa ban ka-ang,

Myu baw shagu lawhpa manghkang;
Mungdan shada tawt lai jehpre
Grit nem matsan ni hpe wahkye;
Majan baw ai Nazi Jamani,
Hka hkrat manang gumshem Itali;
Sinpraw maga Japan gasu,
Tawt lai zingri grupyin htingbu;
Lahkawng lang ngu na Mungkan Majan,
Gara hku she mahtai dawdan sana ta?

British up ai Myen mung dinghku,

Hpunau Myen ni Japan kinyu;
British ni gaw sum let htingnut,
Jinghpaw ni sha dating shakut;
Asha chyam ai Japan atsam,
Asum n jaw Jinghpaw dappram;
Ninghkap majan Jinghpaw adawt,
Kachin Levies Japan hpe gawt;
101 hte Kachin Ranger,
Japan kaw na padang dip la saga ai re . . .

Majan ngut boi Japan yawng hkoi,

Mungdan shanglawt jawm hpyi asoi;
Jinghpaw shagawng jiwoi hkringhtawng,
Masum brang rai ahkyep kamawng;
Sinpraw maga Miwa ni ret,
Sinna maga Kala ni kyet;
Ka-ang shagawng buga malawng,
Magyi Ka a maiwang de hpyawng;
Myit hkrum ga sadi Panglung mare,
Munghpawm Mungdan jawm gaw jawm de saga ai . . .

Munghpawm Mungdan chyalung chyangai,

Jinghpaw Mungdaw daidaw jat ai;
Munghpawm Mungdan January Mali,
Jinghpaw Mungdaw January Shi;

Create PDF files without this message by purchasing novaPDF printer (http://www.novapdf.com)
 Hkying Mi Jahku Tsa Mali Shi Matsat Ning,
Daini ten hta “Kru Shi Masum” hpring;
Jiwoi mungdan masum brang tim,
Mungdaw lu jang myit pyaw myit sim;
Hpunau Myen hte lata gindun,
Kamhpa dik let arau ginrun saga ai re. . .

Jinghpaw ni gaw hparat hkalung,

Hpunau Myen ni sadi n dung;
Jinghpaw ni gaw dingman hpraw san,
Hpunau Myen ni nam rawng malan;
Munghpawm Mungdan zang bai ayai,
Jinghpaw ni nan n hkye n mai;
Hpyenla dingsa yawng bai shaga,
Jinghpaw Dapdung manga hpaw la;
Munghpawm Mungdan tat sum n mai,
Jinghpaw Dap ni hkye la tawn sai . . .

Mungdan ting gaw majan nhpan,

Jinghpaw ni gaw shawng si gwi ran;
Bum nga ni hpe angawk shadu,
Munghpawm Mungdan dinghku hkanu;
Panglung myit hkrum lam hpe n hkan,
Bum nga ni yawng angawk jahpan;
Munghpawm tingnyang kashun magra,
Gumshem lailen dip up shaja;
Bum nga ni yawng maroi n ni,
Rawt malan wa sai nang si ngai si. . .

Manu dan ai Jinghpaw Mungdaw,

Maisak mailung hpunsau gumhpraw;
Nam nga dusat majoi kamawng,
Hka na nga ni majoi kabrawng;
Ja hte lungseng sut rai nlang,
Jinghpaw Mung a arawng ningsang;
Chyeju hpring ai anhte buga,
Maigan wa she sa numdu da;
Sutgan yawng mung shaw la ya sai,
Anhte yawng mung mayam naw tai . . .

Mungchying shawa matsan tsinyam,

Hkru kat ai gaw tai hpyen magam;
Mungkan hpaji anhte dumhprut,
Sak hkrung na pyi atsam she tsut;
Chyurum sha ni lasi lamun,
Tai hpyen wa gaw hpum sau ahtun;
Jinghpaw Wunpawng ramma wunawng,
Lagaw ndung maigan de yawng;
Ngam nga taw ai matsan jahkrai,
Gaida gaina n tai n mai . . .

Create PDF files without this message by purchasing novaPDF printer (http://www.novapdf.com)
 Kau mi rai jang tinggyeng machyu,
Tai hpyen wa kaw myi man hkoi lu;
Sake manawn mayun kumhpa,
Tai hpyen wa a lagaw lata;
Tinang myu hpe kabai shadam,
Banau ni a dangkang manam;
Ramma kau mi kaning n rai,
Nanghpam lusha ahkyen makai;
Shayi num ni hkumshan bai dut,
Hkrit hpa ana myu ting kaw rut, rai mat sai. . .

Jiwoi hkringhtawng Uma buga,

Sut rai mahkra atsai shaw la;
Uru sengmaw sutgan punghkaw,
Banau ni she hkinjawng ningbaw;
Mali yan Hpungmai mazup jahten,
Tanghpre bu ni myit htum garen;
Hugawng lam de kayin mada,
Dip up sai chyup myit yu kahpra;
Yi sun hkauna zing la ya ai,
Maling mala yawng krin ma sai. . .

Jinghpaw Mungdaw ladu bai hkrum,

Shaning sak prat “Kru Shi Masum”
Shadip jahpang ahkang kanang?
Mau nga n mai n dut n dang;
Tsasam wa gaw madu galai,
Madu ni gaw mayam hkan tai;
Hkrap myiprwi hte wa pu jawm shup,
Maigan wa a dangkang jawm pup;
Jiwoi hkringhtawng tat kau n mai,
Anhte yawng a lit nan rai sai. . .

Jinghpaw Mungdaw ladu hkrum ai,

Padang Manau ya bai dum sai;
Nampum nsa hkanghkyi shamawng,
Shinggyim Jinghpaw na ra sharawng;
Mungdaw manau ngu she jawm awng,
Hkanghkyi dusat kashun hkinjawng;
Mungkan ting na Jinghpaw Wunpawng,
Dum hprang saga myu sha zaw nawng;
Jiwoi hkringhtawng jawm pawn jawm ba,
Jinghpaw Mungdaw grin nga u ga law. . .

Ka shagawp ai wa:-
Sau Ka Mai
Kuala Lumpur, Malaysia
10th. January, 2011.

Create PDF files without this message by purchasing novaPDF printer (http://www.novapdf.com)
 Ga Si Ga Ngau Ni = Vocabularies

Asha (n) = Asia continent

arawng ningsang (n) = dignity, status
asoi (v) = glance, glimpse, to view
atsam she tsut / tsam she tsut (adv) = to the utmost
awng (sharawng awng) (v) = relish, enjoy
Banau (n) = fish preserve or paste (the name instead of Burman)
bum shagawng (n) = plateau
chyaloi prat (n) = ancient period
chyinglau (shalau) (v) = to mix disorder
dama (n) = a son-in-law’s family
dapdung (n) = battalion
dappram (n) = guerriller force
dikru (n) = kitchen tripod made of stones (triangled relation system)
dailup daihpang (n) = birth place (usage as twin words of native land)
dumhprut (v) = lack, (shortage)
garen (v) = desolate, to feel lonesome
gindun (v) = connect, link two things.
ginlam (n) = fact
ginlen (v) = relay, (hand-over from a junta to another)
ginru ginsa (n) = migration or descent
ginru lalam ginsa lahkam (v) = struggling to forward migration
ginrun (v) = join together, become part of group
gumshem wa (n) = fascist / Junta
Jamani (n) = German (Germany)
jak lak (v) = confuse
jawm gaw jawm de (v) = to establish together
jehpre (v) = oppose
Jinghpaw Dapdung(n) = (1st, 2nd, 3rd, 4th & 5th) Battalion Kachin Rifles
jiwoi (ji woi) (n) = forefathers (ancestors)
Jiwoi Mungdan (n) = The Country of Our Ancestors (The Kachinland)
hka hkrat manang (n) = accomplice
Hkawhkam mungdan (n) = Kingdom
hkanu (adj) = sordid, dirty, muddy (of political)
Hkawseng (n) = Empiror
Hkawseng Mungdan (n) = Empire
hkinjawng ningbaw (n) = manager in chief (old use)
hkringhtawng (n) = heritage
kyet (adv) = a quick keep
machyang n-gun (n) = strength and ability (usage as twin words of mental power)
mabyin gindai (n) = main cause, main problem, main reason, source
maden seng ai (adj) = teeming and joyous
Magyi Ka (n) = a man with tattoo on his thigh (Burman)
mailung (n) = timber
maiwang (n) = hunting game, chasing prey with hounds
majan nhpan (n) = war (usage as twin words of war)
malawng (law malawng) (n) = majority
maroi n ni (v) = regret will not cease
masin n si (v) = to be temper
Masawp Amya (n) = Mesopotamia (Iraq)

Create PDF files without this message by purchasing novaPDF printer (http://www.novapdf.com)
 mayu (n) = family of a wife’s parents
mayun kumhpa (sake manawn) (n) = bribe
mazang (v) = control, make caring, upkeep, maintenance
Munghpawm Mungdan (n) = Union of (Burma)
Mungmau hka (Nmau hka) (n) = Shweli river in northern Shan State.
Mungnyang hka (n) = name of a river, flows from south to north parallel with rail
road in Kachinland.
nampum nsa (hpyet) (n) = wind from anus when a stomach complaint caused by indi-
gestion
Nawnglut (n) = Indawgyi lake (‘Nawnglut’ means reef valley lake)
ningdi (v) = inhabit as a community
ninghkap majan = counter operation
nlang (yawng, mahkra) (adj) = all
numdu (n) (v) = owner, proprietor, possess,
Padang Manau (n) = Traditional Celebration of Victory (Traditional Manau Dance)
hpunsau (n) = myrrh
Hpunggawn hka (n) = Brahmaputra river (river in western most of Kachinland, in
India)
Hpungmai hka (Nmai hka) = a major tributary of Mali hka; their confluence is at Tanghpre.
hpyawng (adv) = complete entering
ret (adv) = a quick take
sake manawn (mayun kumhpa) (n) = bribe
Saphkung hka (n) = Salween river (river in east and southeastern most of
Kachinland)
shadip jahpang (n) = sovereignty
shanu (v) = dwell or live
sharung shayawt (v) = mourn (usage as twin words of feeling sad)
shawng si gwi ran (n) = to be sacrifice for others
sumtsaw sumtsan (n) = far distant (usage as twin words of far-off place)
Tahkaw hka (n) = Taping river, near Bhamo.
tai hpyen (n) = main enemy
Tarung, Tawang, Tabyi, Danai = names of four rivers in Hugawng valley, by serially from west
to east. The word “Danai” derived from “Tanai”.
Tayun, Talau (n) = names of two rivers in western side of Patkai hill, India
tinang magam (n) = self-ruler, self-governing, self-controlling (never been slave)
tsasam buga (n) = strange land (foreign land)
htanbam (wa la htanbam) (n) = white spot on the forehead of a pig or a boar
Htingnai buga (n) = a particular region southwestern part of Kachinland
Uma buga (n) = Native land (Kachin Canaan)
Uru hka (n) = name of main river in Hpakant Jade mine
wahkye (v) = interrupt
wa la (htanbam) (n) = boar (IDIOM uncontrollable people)
zang ayai (v) = collapse

______o0o______

Create PDF files without this message by purchasing novaPDF printer (http://www.novapdf.com)