Biblioteca Paraguaya de Antropologa XXXIII

Yaalva Pangcalhva

Apqueleltemnaycam apquelvaanyam enlhet acteemaclha

apquelvetangvaeclhoo apqueleyvaam nanoo
nahan seclhooc apquelnaya Yaalve-Saanga

Apquelaansaeclha, apqueltaalhoseeycaoc
nahan apquellaanqueclhoo acnaycaoc
apquelpasmeeyqueclha
Ernesto Unruh nahan Hannes Kalisch,
allhaalhmayca dibujo angcaaoc Argello Ral
nahan Erna Ramrez

Yaalve-Saanga

Nengvaanemquescama Nempayvaam Enlhet

2000
 2000; Ernesto Unruh, Hannes Kalisch
Nengvaanemquescama Nempayvaam Enlhet (Equipo Materiales Enlhet)
Yaalve-Saanga
ISBN 99925-3-134-7
 Haaco-Ploom

Eeca so acteemaclha apqueltemnaycam enlhet apvesey Haaco-

Ploom, mooc apvesey Pedro Anton:

Acyasaamcooc coo lha teemaclha

nanoo, acvetaac naat maata apqueltee-
maclha apquelvaanyam. Paej catneemac
quelhvoo nac hay, vaamlha nanooc secya-
ascamcoo! Paej antengyeyac entaava
engquetcoc, vaamlha sengvaanengvocmo
nengnempaveyaam. Nooc nahan nenteng-
yey nentoom, nengyeploycam maata ap-
hayvoom taate engac. Naatepteemac maa-
taa metnaha-pquetcooc hengellhecmocsec,
naysecsa nengyeploycam, yoyaam ang-
yasengvomoc, taan capvaanengvomoc ap-
quetcoc acvocmo alyamhapma aptengyas-
quescama actoom aptaava.

199
Haaco-Ploom Pedro Anton

Vaamlha paej naat co avhaaneyooc metnaha-pquetcooc quelaaney

pooc nahan nengyelhpongveyaam, vaamlhayca sekhaalhenmoo sa acteemac-
lha apquellhecmooscama apquetcooc, ayenyema paej coo taata teemaclha
eyetcoc. Apna taate engac, nenlhaalhma maataa, coocnaateyca paej apa-
mehetseeycam, nanooc apquetsepma taata nahan meeme hac.

Nengyasengveyaam Nengnempaveyaam

Nanooc naat, paej calepvancaac eltemhec apangcavoopquelyemnaa-

nec, vaamlha metnaha-pquetcooc lhoyquela apyaap, eyeplooc maata aphay-
voom, lhecmoosquec maata acteemaclha nentengyey asoc-navhac:
Nennntamenseeycamooc antengyac popyet, paej angyaascamac acpay-
hooclha engyemes. Eeca temeec saat angcooc alhcahayaam, engyeenvaclho-
ho saat acyasaclhalhcahayaam, taan metekhaanehec saat popyet. Taan saat
lheep emoctac acmooclha apmoctay yaangca, yohong.
Vetayaac coo lha acteemaclhapquelmaycam metnaha-pquetcooc.
Taan nahan molteem naat yaangca hamtec, vaamlhayca acma alaasepvaec-
lhoo, quellaaney pangcavoo; pelhcaec naatengyetsapoc popyet angmoctac
nepye. Nooc nahan sooyaangca, yetneec naat apquelteem metnaha-pquetcooc
acvesey sooyaangcacmakhetmoo, quelhvoongcatsapoc asoc-navhac. Savov
angcooc naat apquelteem enlhet acmakhetmoo.

Eeca acteemaclha apquetcooc, vaamlhanhan molaaneesquescama

pelhpaaalh apac apyemnaanec, apyaap apquelaaneesquescama, yoyaam el-
mom apquetquec nahan aptavaan. Yavaclhoho acteemaclha apquelyacyees-
cama alyemnateem yamtaa, han maa yaangca hamtec molaaney nac a.
Taan nahan a, yetaava, yohong molaaney. Toommmalhqueec nahan ayaheem
maa yohong. Vetaclha nengatooc popyet apquetcoc, taan emocta sa naa-
paat, yetsapoc, yayeem yekhe nava, ahamtec eequengnac a nava.

200
 Quellhaalhmaa Apquelnempaveyaam

Anaata, yammeeme acvesey, vec, vec, vec, vec teemangcapaayvam a,

maalha aplhaalhma maataa enlhet. Taan nahan maalha apnatooscamacnaat
anaata acvesey seye. Elnac alpaayveeycam, nec saata apqueleyva a, acvetay
paava lhaa, pomaap nahan popyet. Taan nahan mooc anaata acpaayveeycam-
oo nac hay neeten acvesey teyomaata, maalha alepvaameeycamoo nac a,
neyquema, acvetay nec asoc-navhac. Capayoc maataa,
Laalha acveta ye? etnehec maataa engyaylhohoc acpaayveeycam.
Etnengvomoc maataa. Taan eyeplooc maata acpayhooclhacpaayvoom, na-
sooc nec naat lhaama, maalha altemnascama acyangcaclha asoc-navhac.
Sayquentac ma peyem, yaatyaapa, popyet; actomquec coo lha apcaheem.
Apvetaac naat angcooc peyem, taan emoctac yohong lhaac, yooteeyooc naat
apcaatec.

201
Haaco-Ploom Pedro Anton

Pooc enlhet naat maataa paej aptooscama semheng, vaamlha lhama,

tengyeyooyca paava, yahavay nahan mooc asoc. Quelhvooyca caascama
semheng, calhnooc ma nanoo. Meec naat acpasmeeycamcaa elhong enlhet
acma semheng pac, nataan acmaamay nac a, yoyaam elpasmoc apataam
asoc-navhac. Haavenhan aalhtoopnaloycam semheng nanoo, nasooc naat
catnehelpatmoho, camanyehemecvesey asoc-navhac, nooyaac quelhvoo,
paej asoc-navhac.

Quelhayvoom

Mooc nahan, quelhayvoom, tengyey yavhan, momyoongyengcoc pooc,

nec naat maata aphalhneeycaoc a, anaata acvesey nac metsej, molteem acve-
tayoolhnec naat yavhan, taa engyahalhnamcoc; nasooc naatengcatnehec.
Eetac yavhan, taan naat apqueltemnascama pooc a, apquetcahascama, naaten-
teemac maa. Eequecoo lha alyeploycam maa quelhayvoom, naatecvaha-
neyac a, apquelvaanyam.
Acvetaac co yavhaaan! naatepteemac engyetcahacsec.
Catetamcohoc engyengcoc. Paej eeque yatamanmac yaamet, vaamlhapque-
namteem, taama apyeploom. Eeca apnaaymacoc apqueltamha apquellay-
lheem, yoyaam saat etavamcoc. Lhaangcooptoycaoc a, taan nahan popom
aptoycam neeten, paej mooc asoc.

Elpetsesec ma paalya apquelhayquenta maataa, yavhan alyepetcay ap-

yengmenec, mollavquescama congne acyetnaclha aalhva yaamet. Taan eeca
lhama apquenmaycam apmaatekhayoo yavhan, yoyaam enatamoc yempe-
hec apac yavhan aptoom. Haavenhan acyevey aalhva, paej naate vaecmoc
penneelha apquengqueem. Engyeenohoc maata apquengqueem neeten, taan
cayaavohoc apyengmenec cooneng nava aalhva apquengcaclha, yoyaam
nec naat calyepetcohoc yavhan apyengmenec paalya.

Han hay teemaclha metnaha-pquetcooc. Paaaeejjj, mengyaanquehec

pooc, hoocteepquellhaalhmaa. Saata apveta mepque yavhan pac pooc,
paaaeejjj engyayooc evataamohoc mepquepsoycam, emlascoc maataa, paej

202
elteemooc evataamohoc lhama, vaamlhacmoo mooc aplhatamaycaoc yempe-
hec apangcaaoc. Alhtoooc maata apqueleenmooc ellhong quelhayvoom,
taan elyapmaoclhac aayen acyevey. Lhama-emec naat lha apquelsoom paal-
ya; taan yempehec, quellaaneyaac aplhaataaoc yoyaam eyespongcaamec-
lha, paej cvesey valte nanoo. Yaamactalhnaam maataa eltaheclha, taan
elyaataam pooc:
Angeltaheclhac saata! Yamacaac coo.
Moo mooc apquelpekheeycam.
Heey, nooc saatema!

Paej nahan yengmen apquelsoycam, vaamlha maalhepquelmopvan-

caacnaat. Paej valte nanoo, vaamlhanyekhe yaatengvaalhva apquellaaneey-
caoc; apnataamcaacnaat lhaanhan allaaney. Vetayaac coo lha nanoo
vayca nac naat nengelteem a. Paej eeca vayca teema nac hay, yaatengvayca,
vaamlha vayca pangcoo, lhama ac maa vayca yelpa molaaney.

203
Haaco-Ploom Pedro Anton

Yetneec naat nahan alpeeneescamoo apnataamcaa actengyeeycaoc que-

ntem, yoyaam etavamcoc saat elvaclha. Eeca peeneescamooc naat lha cal-
yemyekhec aatong quentem, han a almoopeyooclha, yoyaam saat calhya-
vamohoc etavamcoc apquelvaclho nac tengma a. Paej eeque mooc nentoom,
vaamlha quentem. Vaamlhanyekhe acvaclho nac acmakhetmaclha laapang,
taan catnehec caascama nentoom, taaac catnehec tengma nentoom yavhan,
maaneng nahan yavaclhoho.

Nenlhoy Nengmovaan

Mooc amyaanhan, secvetay naat nahan coo, apquelteemaclha metna-

ha-pquetcooc apqueleltemnaascaoc yoyaam etnehepquelyoholhmaa, han a
apyeneeycaoc anmen. Apetsesmeec naat apaatong engyaamac nec naat lha ap-
mopvaan pooc, taan engyetsapoc a apquetcoc. Aplhoyaac nec naat yoyaam
etnehec apyoholhma, nataamen acteemaclhanhan hay, apquetsepma nac
hay. Lhe ecmenaecmaasaamcaa payhoo paycoc, yoyaam elhaatekhangvo-
moc.
Saatetnehec aaso! apteemac maa naysecsapmenaecmaascam.
Lheep saatengcayetna! taa etnehec maataa pooc.
Naatepteema nac maa elpametam quelmenaecmasaclha.
Teema nanyekhe aptengyammaap aphalhnangcoc paanateem-engyaap
han hay, tengyammaap aphalhnangcoc apyoholhma, moyahayaam maataa.
Nooc ma apnateymeeycam, aplhoy nahan asoc yoyaam etnehec apyo-
holhma, acvesey apnateymeeycam apquetcooc. Taap naatema, elpasmec-
lhac maataa elhca. Seclhooc apmeyhec ma apquetcoc, melnaamquehec sec-
lhoo. Taan evac maataa pooc, metamquehec naat lhaa engyetsapoc. Acvoc-
mo apquetsepmama, taan epatmacpoc, calhec acpasma, naysecsa apquellhe-
ngaam apnateymeeycam. Pooc, engyaaynec apcaatec, taan apcaanet a nep-
lhet, taan apmancoc pooc. Calhec acpatmaoclho nava acyevey elhma apnay-
camcaaclha apquelyoholhmaa; lhe cpacanveeclhoma.
Elanam saata! etnehec maataa pooc.
Eehe, peenaasooc lhaac co selaanaamcaa.

204
 Mengyetsepehe, vaamlha, yeecavoonyekheplhoy, etnehec maataa
pooc, eeca cahaney ellanamcoc.
Nateymeeycam han maa, secvetay nahan coo.

Taap aplhoy hay han maa, Aatengay naat molteem, taan nahan taap
apyoholhma lha. Nec naatepmaatengvaecmoc maa Neenequev taap. Haa-
venyekhe tovama, nengcoocnaat nengmoolhama, tovangquelvaanaay-
quepmaamac, taan apnaecmoma. Sas naatepteyaascamcaa hay Lhaapang-
calvoc apvaaectamo, taan apvaeclhoma, taa apmatnama; caammaap naa-
tema, hoo pmatnaeclhoma makhay. Nengcoo nengmoolhamama, maa-
tengvaecmo nac maa.

Ayeenmoopquetcoc nec naat aplhoy apmopvaan enlhet, mepquelhap-

taava, yoyaam capvaanac nahan. Noo nanyekhenhan lha nengcoo. Tasec
nahan elhcac apquetcoc apmopvaan naysecsa aptengyey apyasengveyaam
noo nac paanatee-ngyaap, taan elhcac nahan aptamhaycam.

205
Haaco-Ploom Pedro Anton

Quelaaney-Pooc

Acvetayaac co apteemaclha enlhet apquelaaney pooc, vaamlhayca

apquelpasmeeycam apquellaaney nengmasqueema to. Pooc elyaataam:
Etameleclhac saata, etnehec maataa.
Pelhcaec naat eyecpelcoho, teema nac nengcoo nengelvetay hay paanatee-
ngyaap. Pooc eeque lheenec, han a meyaasaamco nac a:
Paej co hepayhooc lha, paej ayaasaamcoc, etnehec elpamehetsacpohoc
maataa.
Pooc eeque maataa taap apmopvaan, canyentac maata apvetay naat lhaam-
a tamha apsavhongvaecmoo.

Acyenammalhca Anmen

Acyasaamcooc coo teemaclha metnaha-pquetcooc alaanaalhcoo, acnoo

nac nahan lha acvaclho maata apyeneeycaoc aptahapquescama yavhan, teves
anmen. Taan elhcangvaclhapmamyooc lhama, acmaayaa nac caynalhcac a,
acyepcoonammalhcalhnec naat lhaa a.
Coctamha? etnehec elmalhnaam.
Nengyamaclhanyekhe, etnehec apyepcoonmapmamye.
Heey, angyenec saata!
Nasoongcatnehec caynalhca, quellhaangvaeclha maata apyecpelquee-
moolhnec naat lha acmasca a. Taan eynamcoc, eyeyyyhec poco-phaapac!
Soonyekhenhan calnaapoc, melpametameheyquecmasoom. Han hay met-
naha-pquetcooc, paej acmasoom amyaa, paej apquelloom alnapa nac a. Paej
acmasoom apayvaam pooc, vaamlha ellheenec a, anaatalhnec naat lhaa a.
Taan ellheenec maataa:
Yengmen saata antengyamcoc, lhaangcooc maa, lhaangcooc nahan
nengyeneeycaoc maa.

Paej yekhe amyep apangcaaoc, vaamlhayca apyeneeycaoc. Paej nahan

caa, vaamlhayca yavhan aptoycaoc, aapetec, nahan mooc asoc mokhanma,
han hay enlhetaoc nanoo. Nasooc paej asoc, paej nahan amyep. Amyep

206
yekha a lengco, vaamlhayca capvanquehec nahan lengco engyaane ampas-
meclha, teem queltamhooc naat lhaanhan eetac asoc apac acyaanmongaam.
Quelteemooc naat nahan eetac enlhet asoc apac, taan aptengyeyaptamhay-
cam payhoo lengco; vaamlhaycanyekhe nentamhaycam a manten. Cooyca
paej naat atnahaycam, tes naat lhaakham, hengvennohoc nec naat lengco.
Eeca socteemaclha secvetay coo metnaha-pquetcooc, mepquecmasca am-
yaa. Vaamlhayca apvahaneeycaoc pooc, queltengyeeycaoc yengmen nec
naat lhaa a.

207
Haaco-Ploom Pedro Anton

Lhoop nahan Heena

Moocteemaclhanhan heena pac, haave acvaya nac maataa a, vaamlha

apquelteem nac naat heenacpaasyam, apquenaeclha actec. Vetayaac nahan
acteemaclha apcaspeeycaoc, haave vaetcahac, vaamlha apquellaaney pang-
cavooc lhoop. Taan nahan vangcayaam nec naat lhaa a, capheveclhac apya-
temeeneeycaoc lhoop ayettec, han aclanalhnec naat lha vangcayaam ac
heena, taan elhatmeclhac maataa lhoop apac. Yasengvayaam anet actam-
haeclha yoyaam engyaspoc, paej cvesey soolyayem pangcaaoc, vaam-
lhayca apcanma pangcooc heena. Esavhamco senhan maa heena va.

Actamelayca hay quelhvoo apquelvetay apquetcooc, sas nahan ap-

quelvetay apyapmaec, quelpamehetsam nahan maataa. Noo nac coo lha
eyetquec, alpamehetsam maataa. Cooyca paej apamehetseeycam taata,
paej atneemac meeme, ayeenmoo ehetquetsec motneem meeme.

208
 Nentalhnama Nanoo

Paej naat apaava nanoo, vaamlha popyet apyempehec allantalhnama

quelvaanaa, eeca quelyelhvaaseesquemquec naat nepvaaec cooneng, noo
nac yaateeymeem. Paej mooc asoc, lhaangcooc allantalhnama quelvaanaa
popyet apyempehec, saaass naat angelaanoho. Taap angcooc naat apquelen-
naavaa, vaamlha apcahapseeycam apquenlhaclha apnataamca alootma.
Secaayca paej, quelaalhneeycam nasa. Paej eeca nengmasqueem, name-
layoo sa. Quelyevey naat enlhet, nengmeloo nac antooc maa nentoom na-
noo, soonyekhe vaamlha yavhan, aapetec nahan mooc, maayet, cyeyva, mee-
pa, yavaclhoho asoc aptoycaoc enlhet nanoo. Paej apyeecahay, cahaney
esanta sa. Quelhvaayca paej atayac hay catavalhcac asoc-navhac teema
nac nanoo.

Nentoom Ayoholhma

Alaanaalhcoo asoc secvetay coo lha actoommalhca nanoo. Taan

eeca mellacsehec ellaanac enlhet quelengyaamet nac molteem a. Sas nec naat
lhaa engquetcangcatooc quelvaanaa, naekhe sas ataaoc alyayeemoo.
Pooc maataa elheenec teemaclha sengvaaneesquesqueyaam molteem nac
naat a, yaavey-yaamet. Lhama nenteem nec angyatmoc, yavaclhohocnaat lha
angyasengvomoc nenteemaclha, naatepteema nac maa. Acvetayaac naat
coo lhama, teema nac maa, paej eeca alteemooc ayatmoc coo lha. Vetay-
aac nahan a, savaalac-yaamet. Paej nahan alteemoo, soonyekhe heleltem-
naascamcaa yavaclhoho metnaha-pquetcooc yoyaam calhec nengmovaan
angyatmoc, antahapsec lhaayca nengeltemeem acpeyvomoo nempayvaam.

Nec naat lhaayca nengayaclha antooc lha yepheema ac meepop,

angetsapoc quelhvooc mongyasaamcoolhma, naatetnehec. Paej catameloo
toopquetcoc yepheema ac, quelhvoongyetspoc metamelsacpoo nac a, naa-
tepteemac. Nooc nec naat neptaana-yaamet, quelhvooc nec naatengyetsapoc
apquetcoc calhepmopvaan, han a, neptaana-yaamet nengyelhpongveyaam.

209
Haaco-Ploom Pedro Anton

Meyasamquehec emyavacpoho pangcoo, etengyangvomo saptoom pooc

lhoyquelapcavneem pooc, taan eselhnanacpoc. Lhamooc acteemaclha ap-
quelyasengvayaam metnaha-pquetcooc nanoo.

Nengvaamlha nac hay, acyasengvocmec nahan nenteemaclha alhnang-

coc. Nenteemaclha nanoo, acyasengvaecmec nahan, lhamooc acteemaclha
secyasengvayaam nanoo, teemaclha apqueltamhaycam naat metnaha-
pquetcooc. Eeca paej naateco avhaaneeyooc maa, tengyeeycaoc nec naat
lhaa yengmen, paej avhaaneyac, paej naatema. Vaamlhayca secvahaneey-
caoc nasa apquelyoholhmaa. Canemquec naat yekhecoo lha ayelhpongvo-
moc.
Alanam saata! yekhepteemac seta.
Paej naateyca angvahalhenmoo.

210
 Alteemaclha Aptoycaoc

Lhamooc coosvetay acteemaclha nentoom amyep. Hoocteem acvetay-

ooc quelteemaclha metnaha-pquetcooc, lhamooc naha aptoycaoc. Eequema
nalhma, paej aptoycaoc, paej teves nalhma. Caaat naat acyetnamaclha nen-
toom, han maa, ettecnaat molteem, moyanmaclha yateepa. Ayemhaclhay-
caahayca yengman, moctec nahan teves.
Paej nahan aalhva, vaamlhanhan mocmetaam maalhec, han a yelpa
nac acpaasyacmoo a. Calhec acyassa seclhoo, taan cateclhaalhcac teves acya-
maca nac a. Paej cvesey asoc nanoo, paej poco, vaamlha naamoc mocme-
taam apvalhoc, yoyaam calhec acyemyesa teves mocteclheclhama acvesey
samong; calhe sa acpetsesa makhay. Eeca socteemaclha molteem coo-
nalhma.

Eeca amyep, lhamooc acteemaclha nentoom. Apnaycam amyep, ap-

tavcamquec maataa peheya, yangvocma, meeyac. Eeca yangvocma, taaac
nahan molcanma, taan etavamcoc maataanseca apquetcooc. Nooc nahan te-
ves ayemha neyaava amyep. Mooc nentoom noo nac hetcoc, congne lhoopac-
tec acnaycaoc, teema nac quelyayeem, nooc apectengaoc, eeca tac acyelhna,
vaamlhayca camakheetehec nahan quelhvooc maa hetcoc. Lhamoonyekhe
aptomaclha enlhet nanoo. Etengyamcohoc naat maata apangcavoo, haave
vaamlha quelvaanaa. Tengyamquec nahan maataa lhaapen appoc. Eetaangvo-
moc maataa pooc, apasmeeclheec nahan apquelpatmeeyquenta, taaac vesey,
quelahapvaecmoo maata aptoycaoc.

Acteemaclha Apquelpameeteeycam
Metnaha-Pquetcooc
Vaactaac angcooc lhama nengmasqueem pac metnaha-pquetcoc aptam-
ha aptengyeyoo nentoom, camascoc nahan aptoycaoc apmoolhama, han maa
nanoo. Vaamlhayca teemaclha nanoo, lhengcaasooc naat paej nengmas-
queem pac enlhet, halhnangcavooc maataa, elpametamohoc nahan acnoo

211
Haaco-Ploom Pedro Anton

nac talhnaam, mopvaan elmalhnaoclhac pooc:

Talhnacmenyekheee, etnehec maataa pooc.
Talhnacme enghalhnangcavoonyekhe, paej mokham angvetac neng-
masqueem, etnehec engyaatengmoho.
Acnoonhan maa alhtooo:
Quetsacaanyekhe, etnehec.
Eehe, quetsacaa ye. Enalhaatekhaoc saata! Etengyaoc saat apquelya-
mongquelhma!
Maayaaclha eltengyamcoc yavhan, lhaapen, popyet; aaso acteemaclha ap-
quelpameeteeycam metnaha-pquetcooc nanoo, acmoo mooc, yoyaam el-
pasmeclhac apmaayaaclha eltengyamcoc. Lhamaplhaanma, lhoyquela pooc:
Angeleeyoc saat, antengyamcoc saat nentoycaoc!
Lha angcoopqueleyvaam a, lha angcooc actamhapqueltamhaycam a, teng-
yeeycaoc asoc.

Quelvaana Altamhaycam

Mooc asoc, quelvaana altamhaycam. Yoyaam calvetac altamhay-

cam, catengyamcoc seclhooc tamama, yoyaam catyapoc asoc, taan caloo-
tec aayen. Maalha lhama semmaana acnelhpongaam, taan coonohoc alootma
lhacnem, eeca vaeclhookham alpeenesa, yoyaam saat callhatmoc asoc, ac-
noo nac laapang, quentem nahan mooc nentoom, vaeclhoo taama alaaney
ayanquescama yavhan apquenamteem ataava, yoyaam engyengcangvomoc
netnoo.
Eeca sas naat alyetnaycam apquelpatec, taan apquellantepquescama
pangcavooc asoc, acnoo nac mokham quelhvoo nac hay. Acnoo nac yaa-
tengvaalhva nahan vayca yelpa molaaney yoyaam calhec akhana aapetec.
Eeca meec acvatnama vayca, yoyaam etneclhac taej, eeca tes naat nahan.
Eeca aapetec acyevey, noo nac napoolheng, meec acmeetemquescama
maalhec, yoyaam calhe ectamha namaalhec. Nooc nahan ma anaayem,
mee yalhengquescamoo sa loomoo acyavaclhoho. Calyepetquehec aapetec
ma alhquepcoc, quemhaapaamooc nahan aapetec. Yoyaam nec naat cathaa-
pehec aapetec, taan calhe ectamha namaalhec, taalhacyevey eeca.

212
 Nempasmaeclha Nentoom

Eequema seclheena lhcac aptengyeeycaoc asoc-navhac, haave lhap-

cooc naha aptoom, nepvaalhvalhnec naat lhaa a, aphekhec, apekhaoc. Ca-
makheetec hay, taan eleevac apmoolhama:
Makhetquec nepvaalhva! Elmeyanta halep! Yengmenaata halep!
Moc atqueetseca elyatemeenec maataa, anet apekhaoc. Quelpasmaeclhee
sa etavamcoc popyet, mepque apcaayengvayaam, acmoo mooc naat apquel-
lhoy.

213
Haaco-Ploom Pedro Anton

Vayooc naat nahan hay nanooc naat Yaalve-Saanga, ayenyema ac-

tamhaycamcaaclha angcooc metnaha-pquetcooc ayeenmoo nanoo apque-
laoclha. Eequema nanoo, paej acyaanmongaam, aptengyeeycaoc nasa
asoc-navhac, paej elteemooc acyaanmongaam. Actamelanyekhe antemhec
hay, nengelpasmaeclha, taan catnehec acmoo mooc nengmeyaasqueclha
engmooc nentoom, haave yoyaam angmeyvoc nentoom. Eeca semheng,
maalhanyekhe haave engmooc, eeca engvanquec angmeesec nengaayengva-
yaam, ayenyema queltamhooc nahan catooc actoom acnoo nac nengcoo,
haave yoyaam angmeyvoc naalhet. Semheng actamha maalha sengelpas-
moom, engmooc yekhe, eeca actamha sengelhalhneesseeycam asoc, laalha
acvaa alhtaa ye, catnehec engvalhoc acpaayva nac a. Eeca catlapsec maa-
taangcalpayo acna lhaanyekhe acvetay.

214
 Sengaanamaclha ac Sengelyamhapma

Eeca so acyetnaycam maataa ahatec quelhvoo nac hay, actamelan-

yekhe nengelvetay, calhnoo maa nanooc naat, sas angcooc quelhvoo nac
hay. Caa lhaaycangquenyemayac nahan a, nenlhamaeclho, caanetooy-
quema enlhet nanoo, eeque lhama ac elhameclhac enlhet a, acna nac caaya
yaanmaan. Elenyentac yavaclhohopquelaoclhapquellaaney caaya pangca-
aoc, quelvaanaa caaya angcaaoc, yepetcay alyamhapma. Eeca haave al-
yamhapmapquetquetsec, paej nec naat catamelooc calhec alyamhapsa loo-
moopquetcoc, paej capvaanac aptengyey asoc. Eeque quelhvoo nac hay, ac-
vetaac maata apquetcooc alyamhapma, lhengcasquec paej capvaanac maataa
epasmoc aptaava pooc, quenyectac maata apyaap asoc apac, yoyaam epas-
moc aptaava. Eequenyekhengcaymaalhcac maa elyasengvomopqueltam-
haycam apangcavoo, yoyaam eltemhec apasmoom apangcavooc apna-
taamcaa, mepque pasmaeclhapyaap.

215
Haaco-Ploom Pedro Anton

Acvetaac naat coo acteemaclha yoyaam calyemhapamcoc, taan

elheenacpoc:
Nehe pac lha! Paej capvaanac etengyac asoc lha, catnehec amyaa.
Capvaanangyahayoc lha! catnehec maataa amyaa. Eeca enlhet apquet-
coc mopyamongquelhma, saateyca angelyamhapsec maa, teemac elheenac-
poc.
Meec naat maata alaancamcoo apteemaclha.

Nooc nahan quelvaana yetcoc. Paej angcooc cavaanac cayeplom nahan

angquen, han a quentem nac actengyey a, cavanquehec nahan calyamhaa-
poc, taan calheenalhcac caltaheeycam:
Cavanquehec calyamhaapoc caltaheeycam quelvaanaa! Mopquelta-
heeycam lhee! catnehengquen. Cavanquehec capasmoc ataava, caha-
neclhehec nahan!

216
Sas cayaasengvomoc seclhooc actamhaycam actengyey tamama nahan ak-
hanma nentoom, teema nac maataa mooc quelvaana yetcoc, yasengvocmec
tengyey tamama, acnelhpongaam nahan alaanaalhcoo asoc, nahan tengyey
quentem. Taan catlhensec neeten aptoom angyaap, yoyaam etooc saat apva-
actamo, angquen ayenyemay altemnaascaoc. Teemaclhatquetsec maata
ayeenmoo moltemnaascaoc, yoyaam saat calhyavamohoc acvocmolyamha-
pa. Nasooc nahan aleltemnaascaoc angquen nanoo, naekhe paej mooc asoc
allaaney.

Paej naat masentengyasquescama entaava engquetcoc, ayenyema met-

naha-pquetcooc. Quelhvoonlhoyca hengelyamhaapoc maa, acna meeme
engac nahan taata engac. Coocnaateyca paej, maalha traenta mokhetma hac
selyamhapma.

217
Haaco-Ploom Pedro Anton

Secmoolhama Seta

Nec naatepquenyemac taatama Toopac, nahan meeme. Paej eeca ay-

aascamcoc apvesey taata, paej atayooc taata, paej nahan apamehetseey-
cam. Caasooc coo haave sevaanemquescama taata nahan meeme, nengmas-
queem acyemnateem naat lhaangcaheemac, lhamacteem. Eeca cooco ap-
tamha sevaanemquescama, apquetsepvaya nac Savaaya-Amyep a, Yoocsee-
Pyevey naat molteem, apyaap a, Ooplaam Kyelacnaatepvesey. Pooc nahan
haavoc apnacnaat Lhaapangcalvoc, Maeclhaay naatepyaap, 1997 apquetsa-
pacnaat, taan nahan seta. Vaamlhacnaat secmoolhama payhooc maa Lham-
hapmec.

Lhapcooc coo selaancam maa seta, paej enlhet, vaamlha nalhma.

Lhapcooc ma seta, quetsepmeec seema, lhapcooptamhaeclha. Taan yek-
hecoo lha maalha meeme han a seema, quetsepmeeyca, maalh taata hac
seta selaancamcaaco lhapcooc a nalhma. Paej angvaayac seta, paej yek-
heplhengaam apmenec, moocteemaclha nengmasqueem pac. Soc naat laalha
acteema seta ye, apmancoc naat lhaa, paej eequetyaascam.
Noolmenaa sa! Naa yangvaa sa, etengya saate pangcooptooma!
naateptamhac seta. Maayaaclhayacsec, lhaha macvaplhangcoc, maaya-
anhan lengco, cat lhaayca.

Nasooc coo paej angvaayac, mepque secyangvactama. Neptaana na-

han mooc asoc, paej angvaayac. Tengyaac coo macvaplhangcoc maa am-

218
yep payhooc maa Lhamhapmec, lengcocnaat lha apcanma. Nengggatooy-
ca apqueleyvaam lhaapen tengyey macvaplhangcoc, paaaeejjj ca atnehec
coo lha amoctac ma, paaaeejjj asoc. Paej nahan co apaava, paej engyen-
yeemac ma, vaamlha apaavaphaapac seyaleeycam.
Vaactaac cooma amyep sectengyey sectoom. Paej nasooc caayooc
engquenyec ootac asoc.
Meetehec saat lhama soc, teemac seta.
Nasoonteemac, soonyekhe nalhma, caa lhaangcalhohoc a, Soomcom-Yel-
pa; cat nahan anlhong noo nac a. Saanga nalhmacnaatepnaecmoc seta, teng-
ma nanoo, vetayama seta, caymascama yengmen eeca. Paej nahan alh-
naanyacmoc, soonyekhe cat. Nalhmaysecsoo apnaycamcaaclhacnaat lhaa
metnaha-pquetcooc.
Tahaclheec mokham ma apyetnamaclha seta, secsaclho macva, paej
yanyehemoo pteepaeclha nac a. Taan aptoma secsaeclha macva seta. Lhama
naapokhacnaat quetsepmac, paej yekhengcayavaecmongyetsapoc. Cocnaat
laalha acteema nengmasqueem pac, aptapnaoc naat lhaangquelyelcammalh-
ca. Moyascamcolhacoo lha acteemaclha amyaa, vaamlha moltamhaycaoc
naat mataymong aato, paej lhaayquenyekhe. Paej eeca angvaayac; eyaa-
sekhayooc naat seta, acteyanmoo sa lhamoo alhtaa. Tapeeycamque sa,
yoholhma pangcooc naatema seta, hoosa mothanyeyacnaat coo lhama
soc. Lhama ac apteema payvaam:
Naa yangvaa sa! Cat angcoonyekhe lengco. Emyaclha saatema leng-
co, eetac saat lhaa enlhet, etengya saateptoom!
Setacnaat lha apmopvaan selaancam naysecsa secteyaascam elhap-
coo, maalha setamenquescama seyeploycam apmopvaan seta. Eequema
secyaascamcoocoo lha maata apquelvaanyam, secvetaya maalha apcaan-
cammaap naat seta. Paej naat lha pooc, paej eequecoo lha ayaascamcoc,
paej yecnaat laalha apyaalheng. Lhaha, apcaammaap naat lhaangquenye-
mayac, yoholhmacnaat lhaanyekhengquenyemayac, naat lha apcaammac-
poc maa. Han coo selvetaycam hay, maalha acteem nasooc apquelmop-
vaan. Yekhe maalhanhan haave nasoo. Noo nac lha paanatee-ngyaap, vet-
aac maata ayetsepmansecaa, nooc nahan ma nanoo apquelananyekhe
maataa. Paejjj, capvanqueheyca etamenquescamoc capayhoolhnec naat
lhaa a.

219
Haaco-Ploom Pedro Anton

Selvetangvaaecta Enlhet

Heey, emyaclha saata! Saatema tengma, eetac saat lhaa enlhet

eleeyoc maa lengco, lheec saat acyantamaclho, tamhac seta.
Nasooc coo lhactamhac secmeyantamo, alhtooo, paej mokham asoc sec-
vetay, soonyekhe nalhma angcoo, teemaclhaakham enlhet aamay pac, at-
quetsec, naalhpavooc nahan actengaoc yamtaa, haave caalo aamay ac. Vaac-
taac maa lengco tengma pangcaaoc, nengatooc heetaac.
Soc lha actamha apteyaasaamcaa nac lhapcooc que? naateptamhac
lengco helmalhnaamcaa.
Taan seyaatengmaavoo:
Paej coo taata nahan meeme, vaamlha seta secmoolhama apna nalhma.
Elanooc naat lengco, paej cvesey sectalhnama, caanson nahan neeten paej,

220
vaamlha seyaleeycam apayheeycam aphaapac.
Naa yoong, tamhac maataa lengco. Co lha acvaam emyantaec lheep
lengua tengma pac, payhooc ahae?
Heey, asaclhac saatec nentoom, tamhac coo seyanya lengco.
Paa angvaamac pan, lhamapyevey, nahan aapetec makheetec.
Taan sectahanyaa lhama enlhet. Nasoontamhac seyecpelcoo haavoc
sectahanyaa, apnaakham Yaalve-Saanga apvesey Isbron Martinez, Haaco-
Pmommaap.
Lheep nooque laa! tamhac helmalhnaamcaa.
Eehe coo!
Lha apquempaa? tamhac mokham.
Lhaa ayempaac aae, nalhma.
Lha apmoolhama ye?
Aa ye, seta. Lhapcooc coo, lhapcooc nahan seta, nengnam nengcoo
nalhma.
Lhee. Meyangvactama laa!
Paejjj! Apayvaam maalha maataa seta, naa yangvaa sa. Nasooc coo
lha paej ayangvactamac!
Paa yaa lha tahohoc mokham maa?
Paej, canayquec lhaac lengco ayacsec maa tengma.
Heey, nooc aha! Payhooc tengmama, nepvaa tengma lengco.
Taa seyantamaclhoma haavoc, quempayama tengma. Eeca svocmoma,
quelpalhquemmaap secvetayaclha.

Quelmenaecmascama Nanoo

Acvetaac maa seta, Santaalacnaatepvesey, mopvaan sevhen apay-

vaam. Pooc nahan seta apvesey naat Yenmongaam-Pelhcapoc, quelhvooyca
apquetsepmanhan apquetca alhta, han apyaap naat apquelteem enlhet Quet-
sepmooay, yanemquec naat lhaa. Engyaapenyevhoc naat seta, calhohop-
naycam quelvaanyam a, quelvahaney. Quep, nooc caaya pac hay apcaata-
ayvascama, elmeyaaseclhac maataa neeten, elvayvesentac maataa, quelva-
haneeycaoc eeca, quelyoholhmalhnec naat lhaa a.

221
Haaco-Ploom Pedro Anton

Taan alhtaa, coonohoc maata apcanaeclha, etecpongvaclhac vayca

pac, taan elhengsec maata apmenaecmascama, vaamlhayca acmoo mooc.
Calhnoo mooc acteyapma, taan epcanvomoc maataa, teema nac cooro quelh-
voo nac hay. Teema nanyekhe cooro, lhamapquemha-pmamye, nooc coo
secyetquescama maataa. Nooc naha actengyaeclha mooc apmenaecmascama,
queleltemnaascaoc quelvahaneeycaoc. Teema nac lha cooro, vaamlhayca sec-
yetquescama maataa, talhnamoonhan; noo nac nahan lha cooro callleclamap-
valhoc calyeecahalhcac nengmenaecmascama. Hovvv! Talhnamoopyespoc
aplhengquescama! Caaclacoo lha a secyamongvaecmo. Saaass nec eyes-
poc, makhay calnalhca. Eeca quelteemooc naat yekhepquelvaanyam ayelh-
pongvomoc, paej eeca alteemoo, vaamlha secvahaneeycaoc nasa.
Alanam saata, naat yekhepteemac heyaanec apyoholhma.
Paej eeca alteemoo.
He! Setayque lapnac aha nalhma, altemnacsec coo seclhoo.

222
 Apvaeclha Seta Enlhet Tengma

Taan sectahaavoo apnaclha seta. Secvaclho apnaclha seta, quetsavaa-

sooc secvaclho. Taan seltemnaasaamcaa:
Seta, ayanyalhquee nac lhaac coo alhnamhoc lhamooc enlhetaoc maa.
Canayque nac co amyaclhac lengco a, tengmalhnec lhaac lhaa enlhet a.
Heey, tase nac que! Emyaclha saata! Eeca mehelvangquemehec saat
lheep.
Eequema seta, acyemyeeclheec netaan. Paej yekhe altamhooc ayenyooc se-
ta, haavenhan sectanavaa.
Heey! Nooc saatema! naateptamhac. Avata halhca saat lacoo
lhama lengco, naateptamhac seta.
Taa slengapvaclho seta a tengma, soonyekhe paej aplhengaam,
vaamlhapcalhengeeycaoc nec naat apvaclhac maa, soonyekhe cat apmaclha
nalhma; loyquentaac nec naat apmeoc apmeyayquentamo lengco. Pelapques-
quemquec nec naat lengco apvetaya, vaamlha aploycaoclha apmeoc nec
naat, yekhengcayavaecmongyetspoc. Naat coonteemac secvetay hay. Paej
nahan calepvancaac lengco metnaha-pquetcooc nanoo, paej cvesey angve-
tayac nanoo. Quelhvaapquelvay eequenyekhenhan a lengco. Neelha hay.

Seclhengayaam Yaalve-Saanga

Eeca seclhengayacmo Yaalve-Saanga seyeenvaecmoo Peetempoc. Ya,

nooc la elyamhapvaecmoc maa Peetempoc naysecsa caaya. Taan apquelvaac
maa sevhen, quelmenaecmascamalhnec naat lhaa a, savhaacpooc nahan sec-
moolhama apquelyasa. Engyaap nec naat lha apquelyaacmoo, engyaap nec
naat apquelteem sevhen. Paej naat co ayaasac, elhapcooc naat actapaamcoc,
vaamlha etaava seclhaalhma. Taan selyaataamcaaslheena mesyon:
Saateyqueco ayacsec maa mesyon, apqueleyveec enaaymac maa.

Nataamen apquelvaya sevhen apquenyahaycaoc Peetempoc, acpalh-

caeclheec naat coo lhama apquenyahaycaoc. Moctaeclhocnaat pooc, palh-

223
Haaco-Ploom Pedro Anton

cacmec coo hay, amyep nac hay. Payhooc nengnateyanvomlha a, naalhet

amyep, taan nengempaoclhookham. Cattt, Yaalve-Saanga, sevhen coo sel-
lhaalhmaa quenyahaycaoc. Pentaamooc coosnaya, paej ataheemoo. Ac-
neec cooma, Nazaret naat molteem, Nazaret acvaanyam, nekha nac escuee-
la valay a. Naatepyaascamac tengmama nepeyaam; lhama may naat teng-
ma. Caanetooc naat seclhooc tengma nahan enlhet apnaycam nanooc hay,
lhamaeclheeyca. Noo nac coo lha, lhamaeclheec eyetquec, etavaan.
Elhapcooc naat seclhooc secvaya Yaalve-Saanga.
Nanooc nahan secvetangvay Yaalve-Saanga, escueelacnaatetquetsec
secmeyooyam coo, seyempayama Lhaapangcalvoc nanooc angcoo, vaam-
lha escueela secmeyooyam. Taan acteema nasooc nahan mesyon secvaacta-
mo secmeyantamookham acvaeclhoo etaava hay. Paej naateyque la etaava
seclhooc secvaya escueela seyempayama Lhaapangcalvoc, eeca secvaya

224
mooc nem yeploom etaava. Elyamhapvaecmec maa Peetempoc, vaamlha
acmeyaeclhelhacnaat etaavama. Naateyca ayaoclhama, Lhaptaana, ayen-
yemayaclhanhan; acvay eequenhan hay Yaalve-Saanga. Eeca seclhenga-
yacmoco, apquelvayaayca a secmoolhama, noo nac Aayat, Lengua-Pye-
vey, Hentrek, quelaanaacpoo, Mocmo nahan apnaaymacoc, vetangvaac
coo hay. Vetaycamcooc nahan seclhooc apyapaascamco yengmen crestyaa-
no payhooc maa Lhaapangcalvoc.

Cat mokham coo secteyaascam a taap, cat angcoo; nengeltamhaycam

naat maataa Lhaapangcalvoc. Paej naat co amaycam taava seclhooc ayeen-
moostamhaycam, vaamlha savo cyevey; han co maalha secvaanengvay-
camlhama Lhaapangcalvoc. Paej naat lengco tengma seclhoo, paej nahan al-
maasen, vaamlha lhama almaasen acyevey, Oobram Isac naatepvesey leng-
co; quelhvooyca mongelyahammalhcoo almaasen. Taan eeca escueela, acya-
vataclhoho maataa, paej naat nahan canyeemac nentoom ma. Nengeltee-
moonyekhe escueela, eeca paej nentoom.

Secyaanmongquescama Evalhoc

Paej eeca ayaascamcoc ayaanmongsec saat evalhoc, ayenyema acte-

yaascam nasa sectengyey asoc-navhac. Palhcaamquec coo enlhet alecna-
haclho. Talhnaam, quelecnahaclhee.
Paa angvaylhohoc coo lha!
Quetsec eeque nenglengay Tyos apayvaam, haavecyevey. Haave taap ap-
quelyasengveyaam, hoocteem ayeenooclha teees apquelyasengvayaam,
eeca quelyespaquec naat apquelhaalhenmoo, yespaalhquee, yespaquec coo
lha.

Taan yeploomoo motneem coo lha mokham crestyaano seclaammalhco

aha, Yayeem-Peehecnaatecvesey, naat nengcoo tengma engangcaaoc sec-
lhooc maa.
Lheep saat seclhaalhma! naateptamhac selannaamcaa soycam-amyaa.
Heey, naatectamhac.

225
Haaco-Ploom Pedro Anton

Soycam-amyaa seclhaalhma, cooyca haave, vaamlhashaalhenmoo sa,

yoyaam atnehec coo lha secyasengveyaam. Nengelvocmec maa enlhet
tengma, han apnamcaa nac quelhvooc Nateema-Amyep a, nahan moclhama
hay Yaalve-Saanga, noo nac Paala-Pmenec, Taalha-Pmec, Tampee-Nsecaa;
apquelenyemac maa Yayeem-Peehe.

Eeca acvocmo secmaayahay ayaanmongsec evalhoc.

Eyaanmongques lheep lhapvalhoc! naateptamhac soycam-amyaa.
Heey.
Alyahaclhooc naat, pekhaamooc mokham. Eeca mongvanquehec ayeenooc-
lha, mepque nengyaanmongquescama engvalhoc, mongvanquehec angel-
malhna, vaamlha maheltemnaascaoc acteemaclha.
Sas, naateptamhac, yasaamcooc lheep, quelhyavaamooc lheep
sevhaaneeycaoc selmalhnangcama.

226
 Acteemaclha Secyeplavquescama

Acteemaclha nanooc alhta, paej acvenateem nengelhalhanma yapas-

quescamaa-yengmen. Ayanayquec naat coo cat alaylhec, vaamlha anet sem-
maanacnaateyca secyeploom, naekhe cat naat co mahelaancam. Quelhvooc
naat ma helavsa congne yengmen, nenlhamooc naat, nempasmaeclha quelen-
yemay Neenequev nahan mooc apcaoclha. Ayeenmooclhaco moyasque-
yaam hay, haavenhan taap secyasengvayaam, sas nahan, movanquehec na-
han co atnehec neeten. Tyos apayvaam actamhaco acpasmom evalhoc, yo-
yaam motnehec coo secselhnaanemmalhca. Motnehec nahan coo secyem-
talhneesammalhcoo, paej, vaamlha atnehe sacmoo mooc nenteemaclha
crestyaano. Movanquehec nahan atnehec secyennemseeycam, teema nac maa-
taa antemhec a, yaam nengelaanqueclha.
Yaam selaanqueclha paa atnehec evalhoc, engyaanec saat nasoo,
vaamlha ayaspeec maataa heena maa makhay mepquelha tengma, teemac
maataa enlhet hay.
Hoocteem engyaspoc makhay, queltamhooclha eltamhacpohoc crestyaano
naapatooc enlhetaoc.

Naatecoctamhac hay:
Movanquehec co alaaneclhac aalhtoo,
haave secyennemquescama soycam-amya-
a, lhoyquela quelemha-pmamyaa lhoyque-
la mesyoneero.
Paej alteemooc ayennemsec. Temeec ang-
cooc coo secmovaan amyaa, eeca ayen-
yema acyetna secpooscama asoc makhay,
yoyaam ootaangvaclhac maa. Nenteem
crestyaano lhoyquela soycam-amyaa,
mongvanquehec antemhec nengelaaney a-
socmasoom makhay mepquelha enlhet.
Quellheep elyaalhenga, elvascap. Quel-
vetaac as nenteemaclha, elyeplavques!
ellheng! naateptamhac Yoocse-Pquetcoc
sengellhecmooscama.

227
Haaco-Ploom Pedro Anton

Sas angeltamham maataa. Coo sectamha secmaclha nac hay, acvas-

capquec maataa secma. Eyetquec eeca Sacoc-Loom, Elisio, Alfredo, Atina,
Alejandro, Valtar, Antolina. Quetsepmeeyca lhama apvesey naat Litteyo.

Eeca so acteemaclha apqueltemnaycam nanoo enlhet apvesey Pe-

dro Anton, mooc apvesey Haaco-Ploom, apna Yaalve-Saanga. Apepmayca
apvesey Haaco-Pommaap.

228