ANATAN, Alizza Luz

2014 - 04461
FIL40 WFU2
22 Pebrero 2017

Maikling Papel:
Ang Supermaid at ang Super sa Dayuhang Wika

Abstrakt:

Ang wika ay may kapangyarihang mamahala ng isang lipunan, at ito ay nagsisilbi ring
instrumentong makakapaglaya at makakaisa ng mga tao sa isang lipunan. Ang pokus ng papel
na ito ay tungkol sa isang proyekto ni Gloria Macapagal-Arroyo na naghahangad na tulungan
ang mga Overseas Filipino Workers at mga mamamayang nagnanais na maging isa sa
pamamagitan ng pag-iimplementa ng training program partikular sa mga domestic worker, at
pagbibigay ng mas maraming oportunidad sa kanila. Ang mga domestic worker na ito na may
kakayahang gawin ang kahit anumang gawaing bahay at utos ng kanilang amo ay tinawag ni
pangulong Arroyo na mga supermaid.

Isusuriin sa papel na ito ang kaugnayan ng pag-unlad ng lokal na ekonomiya at ang

nangangailangang pagbabago sa sistema ng edukasyon sa konsepto ng supermaid at ang
mga dahilan kung bakit ito ay pinatupad ng administrasyon ng nakaraang pangulo. Pag-aaralan
din dito ang impluwensiya ng mga banyagang merkado sa kolonyal na pag-iisip ng mga Pilipino,
at sa kapabayaan ng pamahalaan sa ekonomikong progreso ng sariling bayan, bilang dalawa
sa mga nangungunang sanhi sa kakulangan ng interes nating magtrabaho o sa pagsisimula ng
sariling negosyo. Ang bawat isang aspeto ng lipunan at problema na hinaharap ng ating bayan
ay may kinalaman sa wika. Wasto at radikal na sistema ng edukasyon lamang ang makakapag-
unlad ng kaisipan ng ating mga mamayaman, na dapat nilang unahin ang kaunlaran ng ating
bayan sa pamamagitan ng paggamit ng wika sa pagkakaisa.

* * *
 Ang wika ay may kakayahang magbigay ng lakas sa ating mga hangarin, at iderekta at
iayon ang ating buhay. Ang wika ay may napakalawak na kapangyarihan, at ang epekto nito ay
depende sa kung paano natin ito ginagamit.

Sa kasalukuyan, kinikalala ang mga Pilipino bilang mabibilis na mag-aaral ng ibat ibang
wika sa buong mundo. Isa sa mga ito, at marahil ang pinakaginagamit ay ang wikang Ingles.
Ang Pilipinas ay pumapangatlo, sumusunod sa US at Great Britain, sa dami ng bilang ng mga
nagsasalita sa Ingles (J. Ramos). Makikita natin ang paggamit ng Ingles sa ibat ibang uri ng
media katulad ng telebisyon, pelikula, literatura, at publicity materials. Hindi tayo nawawalan ng
pagkakataon na makahanap ng salitang Ingles sa mga bagay na ginagamit natin at sa mga
pag-uusap sa ibang mga tao araw-araw dito sa Pilipinas.

Dahil sa kasanayan natin sa wikang Ingles, nagpasya ng isang proyekto ng estado si

dating pangulo Gloria Macapagal-Arroyo noong 2006 na may kinalaman sa wika at sa paggamit
nito upang makinabang ang ating bansa. Sa isang artikulong sinulat ni Lira Dalangin-Fernandez
noong ikatlo ng Agosto 2006 para sa Philippine Daily Inquirer, pinag-usapan dito ang tungkol sa
kakulangan ng trabaho para sa mga mamamayan. Patungkol sa kawalan ng trabaho ng nasa
30,000 Filipinong inaasahang umuwi sa bansa galing Lebanon, sabi ng Pangulong Gloria
Macapagal-Arroyo na naglatag ang pamahalaan ng mga oportunidad pangkabuhayan at mga
programang pagsasanay para sa pagpapahusay ng mga Filipinong nangingibang-bansa bilang
domestic helper. Ayon kay Arroyo, sa pamamagitan ng pagsasanay na ito, makapagpapaluwas
ang bansa hindi lamang ng mga pangkaraniwang katulong sa bahay, kundi mga super maids.

Ang pagbibigay ng pokus ni dating pangulo Gloria Macapagal-Arroyo sa domestic labor

sa halip ng mas mataas na uri ng paggawa katulad ng sa mga sangay ng siyensya,
komunikasyon at pangangalakal ay gumagawa ng pagkukunwari na ang domestic labor ay ang
hangganan na kayang gawin ng mga Pilipino. Sa salitang supermaid, makikita natin ang
eksaherasyon ng gawaing ito. Ineempasis ng proyektong ito ang domestic labor bilang
pangunahing export ng ating bansa. Maraming mga tao ang nakakabenepisyo sa pagiging
katulong para sa mga banyagang sambahayan dahil sa mas malaking sweldo na nakukuha nila
kumpara sa mga sambahayan ng kapwang Filipino. Ito ay pinaka-paki-pakinabang sa mga
taong nasa mababang antas sa ekonomikong herarkiya, lalo na sa mga hindi nakapagtapos ng
high school o kahit elementarya. Hinahandugan sila ng pagkakataong makabigay ng mga
pangangailangan sa kanilang mga pamilya kahit na mababang antas lang ng edukasyon ang
natapusan. Ang paggamit ng salitang supermaid ay kaakit-akit dahil ito ay nagbibigay ng
halaga at propesyonalismo sa domestic labor. Ang super sa supermaid ay reperensiya sa
mga bida ng mga comics books na may ibat ibang kapangyarihang tinatawag na superpower.
Katulad ng mga superhero na mga ito, kapag ikaw ay isang supermaid, hindi ka lamang isang
ordinaryong katulong, ikaw ay may pagsasanay na partikular sa mga gawaing bahay katulad ng
pagluluto, paglilinis, pagbabantay ng bata, at pag-aasikaso ng kahit anumang utos ng iyong
employer.

Sa unang tingin, ang proyektong ito ay masasabing positibo para sa mga Pilipino,
partikular na ang mga babae na nangangailangan ng trabaho. Ngunit hindi naging maganda
ang reaksyon ng iilang mga tao sa proyektong ito. Sa isang artikulo na pinaskil ni Nixon T. Kua
sa Philippine Star, nakasulat dito ang tugon ng isang supermaid sa Hong Kong. Nilarawan dito
ang kahirapan na naranasan niya mula noong inimplementa ang proyekto, at kung paano ito ay
isa lamang pakulo ng pamahalaan upang makakita ng mas malaking halaga galing sa mga
Overseas Filipino Workers. Tinatanong din niya kung ano ang mga pag-aaralan nila sa TESDA
training upang makakuha ng sertipiko sa pagiging domestic worker, at kung ang curriculum na
ito ay karapat-dapat na 10,000 pesos ang sisingilin.

SUPERMAIDS? Meron na bang bansa ang WILLING magtaas ng sahod? sinulat ng

supermaid. At iyong training sa TESDA raw ay P10,000 plus daw ang fee! Ano kaya ang
training na iyan? Ang paglilinis ay di gaano dahil iyan naman po kasi ay nasa tao na.
Sariling-wido. Itututo kaya nila ang pag-handle ng mga different clothings sa washing machine,
like wool, cotton at rayon-silk? Kahit sa ating sariling pagkakaunawa ng ating pangkaraniwang
kultura, tayo ay naniniwala na ang mga gawaing bahay ay inaasahang kaalaman sa bawat tao.
Hindi ito malaking trabaho na ngangailangan ng propesyonal na pagsasanay, simpleng
pagtuturo lamang ng nakakatanda sa pamilya. Kaya sa konsepto ng paggawa ng lisensya
upang makapagtrabaho bilang katulong, inaasahan ng mga tao na dapat higit pa sa natutunan
sa bahay ang naising ituturo ng TESDA.

Kasama sa pagiging supermaid ang pagpasa ng Language Proficiency Test dahil sa

kinonstrukt na POEA guideline na nagsasabi na ang supermaid ay isang Englishknowing
multilingual, knowledgeable of the language and culture of the household she is going to work
for, and with competent workplace communication skills. Ang pagsubok na ito ay nagsusuri sa
kaalaman ng isang nagnanais na maging supermaid kung gaano niya kaalam ang wika ng
bansang patutunguhan niya. Napiling idala ito dahil ito raw ay makakatulong sa pagkaroon ng
mas madaling komunikasyon sa pagitan ng supermaid at ang kanyang employer. Ang
supermaid sa artikulo ay nagsabi na hindi naman importante sa Hong Kong [ang Language
Proficiency Test] dahil mas gugustuhin ng amo ang mas magaling sa Ingles, at kung wala man
sa pamilya ang marunong ng Ingles, mas pinipili nila ang mga Indonesian (para sa anumang
dahilang hindi binanggit). Kinikwestyon din ng supermaid ang autentisidad ng assessment dahil
sa naranasan ng kanyang kakilala na nakakakuha ng mas mataas na puntos sa Intsik kaysa sa
Ingles kahit na siya ay walang kaalam alam sa lenggwaheng iyon.

Base sa nakasulat, binabalik tayo sa pagpapahalaga ng wikang Ingles. Ito ay tinuturing lingua
franca ng mundo ngayon. Hindi nakakapagtaka kung bakit ito ay ginustong wika ng Chinese
employer sa artikulo. Maraming argumento ang palaging ginagamit ng mga taong pabor sa
Ingles. Batay kay Pamela Constantino, isa sa mga ito ay ang pagkakakilala ng Ingles bilang
isang instrumentong para sa pakikipagkomunikasyon sa buong daigdig. Ito ay tinuturing din na
instrumentong sa pagpapalaganap, pakikipagpalitan, pakikihasa, iskolar at resertser sa
anumang larangan sa buong daigdig na marunong din ng Ingles. At huling huli, ito ay
instrumentong ginagamit sa pakikilahok sa anumang transaksyong kultural, ekonomiko at
teknolohiya. Malinaw na malinaw sa karaniwang lipunan na ang Ingles ay tinuturing na tulay sa
pakikipagniig ng mga bansa sa isat isa.

Ngunit sa kabilang banda, nagdudulot din ito ng pinsala sa ating lokal na ekonomiya. Isa
sa nakapagdududa tungkol sa inimplementang proyekto ay kung paanong binibigyan ng mas
malaking importansya ang mga banyagang merkado kaysa sa sarili nating ekonomiya. Ayon sa
Migrante, isang pandaigdigang alyansa ng mga Filipinong migranteng manggagawa at ang
kanilang mga pamilya, ang estado ng Pilipinas ay kailanman mas malamang na hindi
ipinapaloob at binubuo ang pambansa at lokal na ekonomiya, lalo na sa harap ng
pandaigdigang pang-ekonomiyang krisis (G. Linao, 2009). Mas binibigyang halaga natin ang
pagsilbi sa ibang mga bansa kahit na ang trabaho ay mababang uri lamang kaysa sa pag-aralin
natin ng mas maigi ang kasalukuyang kondisyon ng lipunan upang maaari tayong mag-ambag
sa sosyo-ekonomikong pag-unlad nito. Higit pang gugustuhin ng mga Pilipino ang anumang
banyaga kaysa protektahan at pagyamanin ang sarili (P. Constantino, 1996). Patungkol sa
proyektong ito, may ilang mga senador na gumiit na ang administrasyon ni dating pangulong
Arroyo ay kailangang itaguyod ang entrepreneurship upang ang mga Pilipino ay hindi na
kailangang umalis ng bansa. Sinabi din nila na ang kayamanan ng pamahalaan ay dapat na
gastusin lamang sa pagtatayo ng super economy, hindi sa supermaids (Maria Samante,
2006).
 Ang isang mahinang ekonomiya ay resulta ng kahirapan. Ang kahirapan ay nagreresulta
sa kakulangan ng accessible na edukasyon. Ang pagpapahalaga ng overseas work bilang mas
makabuluhan kaysa sa paglilingkod sa sariling bayan ay resulta din ng pagkukulang ng
karaniwang sistema ng edukasyon. Ang isang bansang may problemang ekonomiko ay
siguradong mababa o di malawak ang literasi ng mga mamamayan. Dahil dito ang kanilang
pagsangkot sa mga prosesong pulitikal ay mahina rin. Dahil din dito, ang eksploytayson at
pagdodomina sa kanila ay lalong nagiging masidhi (P. Constantino, 1996). Kalidad na
edukasyon ang unang hakbang upang magkaroon ng kamalayan ang mga mamamayan sa
mga problema na hinaharap ng ating bansa. Sa edukasyon natin nakukuha ang ating
kaalaman. Ang isang tao na may kaalaman ng kanyang kapaligiran ay maaaring mabuhay sa
kabutihang-palad sa lipunang ito. Ang edukasyon ay tumutulong hindi lamang sa pagbibigay ng
kahalagahan sa pakikipagtulungan sa kapwa, kundi nagbibigay din ito ng kamalayan ng
kanilang mga karapatan at mga tungkulin tungo sa bansa. Edukasyon mismo ay isang
karapatan ng lahat ng tao mula noong ipinanganak sila, hindi ito pribilehiyo.

Ang supermaids ay hindi lamang epekto ng mahinang ekonomiya at pagkukulang ng

sistema ng ating edukasyon. Sa mas malawakang sukat, ang pagpupuri ng mga banyagang
produkto, kultura, at lalo na ang wika, ay ang naging pangunahing hadlang sa pag-unlad ng
ating bayan. Kung gustuhin man nating sumulong na nagkakaisa, dapat nating unahin ang
pagbibigay halaga sa ating pambansang wika, Filipino, sapagkat ayon kay Pamela Constantino,
ito ay kasangkapan o instrument ng pagkakaisa at paglaya tungo sa ekonomikong pag-unlad na
magreresulta sa pag-unlad ng kaisipan ng mga mamamayan sa isang kolonyal o makolonyal at
multilinggwal na lipunan.