Professional Documents
Culture Documents
www.chennaimizo.org
chhimbal10@gmail.com
2 Pages
Free Circulation
Since 1998
AN OFFICIAL ORGAN OF THE CHENNAI MIZO WELFARE ASSOCIATION
VOL. LV ISSUE NO. 53 SUNDAY 22nd October 2017
Cowboy FC chu CMWA Presidents Cup a champion ngun ber an ni ta. Nimin (October 21st) a final hmuhnawm takah
Cowboy FC in 2-1 a Taitesena FC hnehin, CWMA Presidents Cup vawi 9 khelh tawhah vawi 4 an champion na a ni a, anni
aia record nei tha an awm lo. Final ah hian team pahnihin inkhel hmuhnawm min entir a, Chennai Mizo level ang ah chuan
khatiang aia inkhel hmuhnawm leh tang beisei tur a awm bik lo.
Taitesena FC in final bul an tan tha zawk a, ball an chang hnemin an goal nawr a na zawk. Taitesena FC game that lai takin
Cowboy FC in Fredrick-a hmangin goal tha an thun a, he goal thun tura Cowboy FC tlarhma player te ball inpekual leh,
Fredrick-a ball lakluh a mawi ngei mai. Taitesena FC in an siphurh sutna hun tha nei thin mahse first half ah goal dang a luhbelh
lo. Second half-ah midfield battle hmuhnawm kan hmuh chhunzawm. Cowboy FC offside trap tlanpeltu James-a goal mawi tak
hmangin Taitesena FC in an siphurh an sut. Fans an tang a, lehlam lehlamah pressure a sang a, player tha tak takten ball pass
sual leh tihsual an nei nawk mai. Team pahnihte an inhnehtawk mai dawn a a lan tawh hnuah, Cowboy FC tan Ruatfelan
penalty box sir atangin goal a thun leh a, hei hi an champion na goal a ni zui ta a ni.
Final-ah hian Taitesena FC in goal thun theihna chance tha an ngah zawk a, an vanduai tih theih ni mahse, hun pawimawha goal
pawimawh thun thiam Cowboy FC te hi vanneih vanga champion an tih theih loh ang. Tournament chhung zawngin chak zawh
loh vawikhat mah an nei lo a, pool leader an ni a, semi final-ah nikum champion FC Anderson an hneh leh a, final-ah team
inkhairual em em Taitesena FC an hneh bawk. Heng te hi vanneih vang a ni seng lo a, an thiam vang a ni. CMWA Presidents
Cup 2017 ah champion phu an champion e.
Cowboy hmatawngah mahni chauh pawha hnawk tham captain Sanglura an nei a. A thlawptu turin ball thiam leh tlanchak
Fredrick, Rema leh Isaac te an nei bawk. Midfield-ah Best Player Rohlua leh Zuala te ho in tlarhma an chawm bakah tlarhnung
an pui tha a, tlarhnung nise nikum best player Aron-a kaihhruaina hnuaiah Raymond-a leh Hmachhuana te ho an tlang mawh
viau bawk. Tournament chhungin match 5 ah goal 8 thunin goal 2 an chhuah a, hei hi Taitesena FC nen inang chiahin, pet goal
tam ber leh goal chhuah tlem ber record an nei ve ve a ni.
Final hma hian semi final-a chak zo ta lo pahnih, FC Anderson leh Runmawi FC ten pathumna zawnna inkhel hmuhnawm tak
min hmuhtir a. Hun pangngaiah goal 2 ve ve inpein, penalty shootout ah FC Anderson hi 4-2 in an vannei ta zawk a ni.
2 CHHIMBAL SUNDAY 22nd October 2017
Kan hriat theuh ang in Presidents Cup 2017 chu kan lo hmang zo leh ta
der mai. Duhthusam in thil kal vek lo mahse Pathian zarah a hlawhtling
hle kan ti thei awm e. He tournament hlawhtlinnna phenah hian mi
thahnemngai tam tak an awm a, an chungah hian lawmthu sawi lo thei
kan ni lo a ni.
A hmasa berin, Presidents Cup 2017 hlawhtlin nan a sum sengtu, sponsor
tu te zawng zawng chungah lawmthu kan sawi a, an tam deuh avangin an
hming sawi vek lo mai ila. Mi thahnemngaite sum thawhkhawm hmang
hian welfare pawisa hmang lo in tluang takin tournament kan siam theih
phah a ni. Hetiang hruaitu, members leh member hlui, CMWA tan a
thahnemngai kan nei hi kan chhuang tak meuh meuh a ni.
Sports Sub-Committee ten theihtawp an chhuahna zarah he tournament
hi hlawhtling takin kan zo thei a, a bik takin kan Sports & Cultural
Secretary Tv. Raymond Lalremruata in pekna zarah ah felfai takin kan
zo thei kan ti thei awm e. Tin, Tv. Michael P.C Lalrinkima chungah hian
lawmthu sawi lo thei kan ni lo. Anin theihtawp a chhuahna zarah ground
hman tur kan hmu thei a, kan mamawh engkim a lo buapui bawk a. A
inpekna a ropuiin a chungah kan van lawm em. Banner nalh tak a min
design saktu Pi Iren Lalnunpuii chungah lawmthu kan sawi bawk e.
A tawp berah chuan, Presidents Cup ti hlawhtling tu players zawng zawng
leh fans lo kal zawng zawngte hnenah thinlung takin lawmthu kan sawi e.
Nangmahni hi he tournament tihlawhtling tu te in ni.
Lawmthu sawi na tur tamtak a awm a, kan sawi vek seng si lova. Sawi
awm tak tak, sawi loh palh kan nei nual ang, in hriatthiamna kan ngen e.
Hun tha min pe a, tournament chhung zawnga min vengtu Pathian chu
fak in awm rawh se.