Añáráttu hóiye kiyó Ruáinga zati,

Monzil añárár hoçé bilkúl áñzai féilli.

Ek dhéilattú ar dhéilat uri uri,

Fakí moton añára bahá árai féilli.

Sára petín gír kulot, suk áñçai sailé aññí,

Ruáinga koum or moton uggwá koum nái.

Foror gór ot foror duwar ot,

Zúri Zúri nizor gór ot cúk cánti kén foórai féilli.

Zar gór nái, zar tór nái, zar matá nái,

Tarár izzot, tarár cántir honó zaga nái.

Zartú matá nái tartú háñsar gorá gorí,

Añára nize izzot gérai féilli.

Fath loi hará hári didi, bon nam zurailám,

Hazor ekkán honó ham to, ájtok no gorílam.

Cúde ekzon e ar ekzon or les thani thani,

Fura koum or beça añára dhufái féilli.

Ar hotókkál táikkoum, fiñdí gulamir zonzir,

Aiyó cóbai mili lagai, narar azadi.

Ehón juddór woktó aiccé kafíc Arakani,

Boiçá boiçá, bicí cómo haçai féilli.