MANAG-ABRI (NEW VERSION)

Manag-abri ang kalangitan, Ang mga panganod maghawa

Magkalipay ang diri sa duta, kag sa langit gahimaya

O Birhen iloy nga palaran, nga natimban sang kasakitan

Tan-awa ang anak mo niyan, nga imo ginkamingawan

Magkalipay ikaw O birhen, magkasadya ikaw Maria

Kay niyan imo nakita, ang anak mo nga pinalangga

Dulaa ang mga kagha, sa imo nga hunahuna

Kay ang kasakit nga bugana, sinayluhan sang himaya

Panasa ang kasubo mo, didto sa bukid sang kalbaryo

Sa pagtan-aw sa anak mo, nga sa krus nagahimugto

Mga kasakit imo gin-agom, nga dughan mo anay naglatum

Ilisi na sing himaya, nabanhaw anak mong pinalangga

Natapos kag lumigad niyan, ang unos sang kasakitan

Sa pagpanubos sang kasal-anan sa mga inanak ni adan

Ang adlaw bituon kag bulan, sumilak sila tanan

Mga angheles sa kalangitan, naghugyaw kag nag-ambahan

Ang mga angheles nagkasadya, ang santos kag mga santa

Kay niyan nabuksan na, ang ginharian sang Gloria

Yari ang manto mo nga itum, akun nga pagakuhaun

Kay amo ang tugon sa akon, sang Dios nga makagagahum

Yari ang korona nga dala ko, igapurong niyan sa Imo

Tanda sang gugmang balaan, sang Dios sang kalangitan

Paalam O Birhen Maria, kay ako masaka sa Gloria

Kay ako ginahulat na, sang Dios ginuong Amay ta