Bureau Leerplicht mester un registro pa por

link cu Censo
ORANJESTAD - Bureau Leerplicht no tin un database/registro pa asina por tin un miho bista
riba e muchanan cu ta leerplichtig entre 4-16 aña. Cu un registro adecua, por bin un
stufstekker cu Censo por ofrece nan informacion di e muchanan aki. Algo cu aparentemente
Leerplicht tin algun tempo ta spera riba dje.

Siman pasa nos a publica tocante un encuentro cu Bureau Leerplicht tabata tin cu cabesantenan di
scolnan primario riba diferente punto di preocupacion. Un di nan tabata si Bureau Leerplicht tin bista
riba e muchanan entre 4-16 aña en general. Bureau Leerplicht ta pensa cu un link cu Censo lo por yuda
nan wak precisamente unda e muchanan entre 4-16 aña ta, ki scol nan ta bay y otro datonan. Pero pa
esaki funciona, Bureau Leerplicht mester tin un database/registro di nan mes, cual actualmente nan no
tin. Esaki ta un parti tecnico cu gobierno (minister di Husticia y Asuntonan General) lo mester regla hunto
cu e directivanan di entre otro Departamento di Enseñansa. Bureau Leerplicht ta informa nos cu tur
esaki a wordo treci dilanti cerca e gobierno anterior mes pero e proceso nunca a sigui. Aworaki Bureau
Leerplicht entre otro ta bolbe manda e informacion/puntonan na gobierno cu a caba di sinta cu speransa
cu pronto lo cuminsa 'laga e bala lora' pa soluciona cierto cosnan.

Muchanan ilegal tambe ta Leerplichtig

Censo ta informa nos cu no ta muchanan cu ta inscribi so ta leerplichtig. Muchanan cu ta biba akinan
pero nunca a inscribi tambe ta leerplichtig. Como tambe muchanan ilegal, segun hefe di Censo, Sharin
Luydens. Simplemente un link cu Censo no lo yuda si Bureau Leerplicht no tin un database. "Bo tin cu
cuminsa na mira ki software tin na mercado. Con Bureau Leerplicht ta haciendo na Hulanda y si e
software ta link na Censo di Hulanda, con esaki ta wordo haci anto kico ta e mensahenan cu e ta manda
vice versa? Pasobra terugmeldingsplichting por ehempel," sra. Luydens ta splica. Censo na Hulanda ta
brinda cliente cu datosnan cu nan mester pa haci nan trabao. Pero e clientenan aki tambe ta meld na
Censo y bisa por ehempel si bo tin tal mucha skirbi un caminda y nan haya informacion for di e mayor
riba un cambio. Por ehempel Dimas na Aruba tin inzage riba sistema di Censo, pues ora un hende bin
pidi inzage, nan ta subi un site y mira si ta inscribi of no, of si bo ta biba na unda of no. Pero un sistema
asina no por funciona por ehempel pa Bureau Leerplicht.

Luydens: "Bo mester un database caminda cu por ehempel bo ta bisa Censo pa yuda bo cu esunnan di 4-
16 aña, nos ta saca esaki y bo ta cuminsa na hinca esey den bo database. Bo ta haci un data match cu
otro scolnan wak si loke nan tin di informacion ta klop." Pero bo ta bay haya algun diferencia unda cu
cierto mucha no ta inscribi pasobra nan ta ilegal. "Mi no a tende Bureau Leerplicht papia tambe over si
nan ta exigi muchanan papel di cinco florin si no nan no ta laga nan inscribi. E cos ey ta prohibi pa ley,"
sra. Luydens ta bisa. Si bo no trece papel di cinco florin of bo ta ilegal nan no ta tuma bo na scol,
mientras cu den ley (Artikel 7, AB 1993 no. GT 33) ta para cu ta prohibi di puntra of obliga e mayornan di
trece un papel di cinco florin, of trece permiso di e mucha pa inscribi nan. Pero algun mayor ta toch
wordo poni pa haci esey anto no tin control.