1.

Cracovia civitas
Te civium unitas
Te cleri pluralitas
Virorum maturitas
Matronarum fecunditas
Rerum ornat copia.

2.Te perfudunt clari fontes

Vallo tegunt alti montes
Hic pereunt omnes sontes
Sumunt dona qui insontes
Decoraris gracia.

3.In te iacet corpus sacrum

Stanislai patris patrum
Hic thezaurus ingens fratrum
Tu reluces ut theatrum
Hic regina mater matrum
Despiciens iam baratrum
Hedwigis sumpsit gaudia.

4.Flos militum strenuorum

In te fulget cetus morum
Hic reperit tristis chorum
Hic fons manat mel amorum
Carens felle odiorum
Scema spernis viciorum
Tu paris tripudia.

5.Tu regine venustatem

Cuius vultus vetustatem
Nescit solam honestatem
Ut ver tendens ad estatem
Prefigurans maiestatem
Intueris puritatem
Per clara palacia.
6.Quam agmina puellarum
Astant pulcre consertarum
Si quis ferat cor amarum
Et inspectet valde parum
Tantam formam specierum
Mox resumit cor sincerum
Et intrant solacia.

7.Phebus stellis constipatur

Duobus natis recreatur
Wladislaus primus fatur
Kazimirus alter datur
Summus parens collaudatur
Pater Deo commendatur
Et que luces Zophia.

8.Consolentur corda mesta

Quo abs prole sunt congesta
Concrepemus leta festa
Wladislai quo ex testa
Nostro evo nunc digesta
Stirps preclara et honesta
Futura solacia

9.Rerum primus conservator

Carismatum qui es dator
Ens encium et plasmator
Collapsorum restaurator
Supplex oro et peccator
Esto nostri adamator
De letari patria. Alleluia.