PAMAMENDISYUN KING KORONA NING ADBIENTO

PAUNANG AMANU

Ing pari o ing commentator mapse yang mapilan a amanu dikil king kapagmasusian.

Ing Adbiento ya ing panaun ning pamagsadia

king panyatang ning kayarian ning Dios kang Cristo.
Iting panaun makapirake ya
karing aduang malinong dake.
Bibilugan de ing mumunang dake,
ding Domingo pilatan ning mumunang Domingo
ning Adbiento anggang Diciembre 16,
a makaparikil king pamibule
king kadua nang panyatang Cristo.

Agkatan nakatamung magsadia

kambe ning maligayang kapanaligan
king panyatang nang JesuCristong
talapañgabus tamu
nung kapilan iganap na ing sablang bage.

Ing kaduang dake bibilugan de ring aldo

a nung kapilan taya umpisan ing Simbang Beñgi
angga na king kapat nang Domingo ning Adbiento,
a nung nukarin gaganakan tamu naman
ing mumuna nang panyatang
inyang mikatauan yang tau
lalang ning Banal a Espiritu
at mibait king Virgen Maria,
a pagmasusian tamu king aldo ning Kapaskuan.

Ing mumuna nang panyatang kekatamu yang gaganakan

at ing kadua nang panyatang
kekatamung yang pagsadian.
Ing uaga na ning pamagsadia tamu
at pamanaya ya pin ya ing Korona ning Adbiento.
Atin yang apat a misindian a kandila
a tatalakad karing apat ng Domingo ning Adbiento
angga king panyatang ning sala a yapin i Cristo.
Ding atlu kule lang lila
tanda na ning Kapanisian ampon Kapanayan tamu.
Ing metung kule yang rosas
a tanda ning Tula tamu.

Matula ta yang ganakan ampon panayan

ing mumuna ampon kadua nang Panyatang.
Mabilug ya ing korona
at nung makananung ing mabilug
ala yang umpisa ampon ala yang añgganan
makanyan nang paganaka
ing alañg-añgga nang lugud ning Dios
inyang itubud ne ing Anak na
ban atbusan ing meto ketauan.
Sagiua la ring bulung
tanda ning alang kupas nang lugud
ning Dios kekatamu.
PAMAMENDISIUN KING KORONA NING ADBIENTO
Ing pari king makayapseng gamat, iyagkas ne:

Manalañgin tamu:
Ding malda manalañgin lang tahimik kambe ning pari karing mapilan a penandit. Kaibat ing pari, iyapse
na la ring gamat na, iyagkas ne ing panalañgin ning bendisiun:

Dios a Ibpa mi,

mitipun kami king lagiu nang Jesus,
ing Sala ning Yatu.
Aduan mi keka ing bendisiunan me 
ing Korona ning Adbiento
a mipaganaka king alang-angga
ampon alang kupas a lugud mu
a meyakit king pamamie mu kekami
king Bugtung a Anak mu.
Saupan mu kaming misadia karing sarili mi,
para king Kadua nang Panyatang
at saupan mu kaming tune magmasusi
antimong kapigaganakan
king Mumuna nang Paniatang
kaniting Kapaskuan.
Kabang sisindian mi la reting kandila,
ipaganaka na sana king i Cristo
ya ing sala a mitabi king karalumduman
binuñga ning kasalanan.
Pagkalaman mu karing grasiang paiñggulut
karing kasalanan mi
ban manatili yang milalablab ing sala
ning lugud na karing pusu mi.
Iti aduan mi king kapamilatan nang Cristong Guinu mi.
Makibat la ring malda
Amen.

Maliari yang mipisikan danum a mebendisiun ing Korona ning Adbiento at kaibat misindian ya ing metung a
lilang kandila.